صفحة 1 من 3 123 الأخيرةالأخيرة
النتائج 1 إلى 15 من 42
  1. #1
    الصورة الرمزية خادمة الزهراء
    خادمة الزهراء غير متواجد حالياً مشرفة واحة التربية والتعليم والاسرة
    تاريخ التسجيل
    Nov 2003
    المشاركات
    1,884

    Lightbulb رواد الشعر الشعبي العراقي ...

    [align=center]رواد الشعر الشعبي العراقي

    السلام عليكم
    أخواني وأخواتي أعضاء
    شبكة العراق الثقافية
    أرض العراق فيها الكثير
    من الشعراء ..
    وهنا

    إرتئيت ، أن افتح صفحة خاصة لشعراء الشعر الشعبي العراقي...
    على أن يكون لكل شاعر فترة من الزمن نستوفي بها بعض قصائده...
    كي يتسنى للجميع الاطلاع على قصائده أو بعضا منها مما سينشر هنا....
    ومن بعدها نتحول الى شاعر آخر بنفس هذا الموضوع ليكون سِفراً كبيراً لشعراء العراق ...
    الفكرة مطروقة في مكانات آخرى وفكرت من نشرها هنا أيضاً من اجل معرفة المزيد عن شعراء العراق لان رواد شبكة العراق الثقافية فيهم من الشعراء ....
    وسأبدأ ..


    بالشاعر

    عريان السيد خلف

    ولد في قلعة سكر على ضفاف الغراف .
    بدأ النشر مطلع الستينات .
    اصدر اكثر من ستة مجاميع شعرية . الكمر والديرة - كبل ليله - أوراق ومواسم - شفاعات الوجد - صياد الهموم - تل الورد .
    عمل في الصحافة العراقيه وفي الاذاعة والتلفزيون .
    منح وسام اليرموك من جامعه اليرموك في الأردن .
    حاصل على شهادة دبلوم صحافه .
    عضو نقابة الصحفيين العراقيين واتحاد الصحفيين العرب ومنظمة الصحافة العالمية .
    عضو جمعية الشعراء الشعبيين .
    يكتب الشعر بأنواعه في اللهجة الشعبية العراقيه والفصحى .



    مختارات من أشعاره

    كاسرت عمري اعله عمرك
    كطعت ليش . . وحِـركتك
    جويه مني وجويه منّك
    ونتشيت . . استاهلك . . شهكة عوافي
    وخيّبت ظني . . وصدك ويّاي ظنك
    ماكلت عنك . . عرك جفّك ابجفّي
    ولا كلت جاسك زعل . .
    واشتعل دمي ابنار دمّك
    أصعر . . وتستسهل . . اتشاغل خيالي
    وياخذك غيّك . . خرز خلخال . . تِـطّــشّـر وألمّك
    ومدري ليش . . أتمايزك وردة اكرنفل
    اِتّيه روحي ابريحتك . .
    واحتار من ياصفحه اشمّك
    أختلي ابحسنك . . وافج كلبي واطلعك
    تلعب ابعمري . . وخاف الغير يندلّـك وأضمّك
    خاف تاخذني . . اعله بستانك فرحِتي . .
    وخاف تكبر حيرتي . .
    وحسنك يغرّك
    خاف تِطشّر ولك . . وشلون المّك ! ؟
    كالو : ايحبك ! !
    كلت من شاف كلبه ؟
    وجبّست دمعي . .
    وسكن نبض الكلب . .
    عن لا يذمّك
    تِرسْ جفّي . . اسوالفك وحده اعله وحده
    وعرك جيدك زمزمي . .
    وخجلان تتعذّر !
    واكلّك : لايهمّك
    من تجِسني اشفايفك
    تاخذني غيبه !
    ومن تِرِشْني ابمزنِتَك . . ولهان افز . .
    لن روحي يمّك ؟
    اختلي ابحسنك . . وأفج كلبي واطلعك
    تلعب ابعمري . . وخاف الغير يندلّك وأضمّك
    وخاف تطّشّر خرز . .
    وشلون المّك ؟
    اشجان ضرّك . .
    تختصر بعدك عليه ؟
    وكلّي شكرات وحمد
    للمختصر . . حسنك ابخصرك
    تشرب معافي . . حناني ولهفتي
    وتسكر ابدمي . .
    وتنتشي ابغيّ الشذى . .
    وتتعزّل اعزال من اجرّك
    من جمعني وياك ؟
    من شدني . . ويه طولك . .
    طعّمك بيّه
    وصرت حلوك ومرّك
    لنها ما بالغبشه . . غبشه . . ابغير عينك
    خاف اترزبيك .. حد كطع النفس
    وازهك واضرك !
    خاف تطشر خرز ..
    وشلون المك ؟
    ومن كبل .. كل شوكه عمري من الطوارف
    حسبت مثل الوداد .. الفات ودك
    من كبل .. وآنه الورع كحل اجفوني
    وجنت اظن :
    وكت التهد بيه روحي اهدك ..
    لني كلما فززن صبري الليالي ..
    وخان وكتي
    اتوسلك .. هدوة كت خليني عندك
    اوعاذرك .. لو هدل عودك ..
    من كدر يحمل حسن مثلك وكدك ؟
    غاذرك تغلط ابحكي ..
    وتبخل ابظلك على النايم ابسدك
    عاذرك تغتاض ..
    بس من غير شاره ..
    وشارتك هالبينت
    ودخيل جدك
    عاذرك .. عن لايهم كلبك ابهمي
    وتنترس عينك دمع
    وتنترس عينك دمع
    __________________

    اخذني وياك

    جملني بعد كطره 00 وخذني وياك


    هناك 00 الفيض كلبك 00


    حتى روحي تنام


    عصفورة جرف 00 بلل جنحها الكيض


    اخذني وياك


    امشي ابغير واهس 00


    والطواري كصار


    وعيوني غرب 00 وجفوف اديه اوداع


    واسمي 00 ابغير معنى 00


    وميل كحلك غاب


    وتنشدني اعله كلبي !


    كلبي حب وذاب


    ياكلبي حلك تنور 00 لو سرداب ؟


    صوغني 00 ولو من ليلكم نجمه 00


    تبات وياي


    ومن تشبع سهر 00


    ويجيسها الوهواس


    اطفيها ابصبح 00


    والغبشه رشكه ماي


    واشعلني ولع 00


    يدوي العطش بالعود


    حتى انزع جلد روحي 00


    وارد لصباي


    أملني الفرح بسمك 00 ورد عالباب


    فاحت ريحته 00 ولنك بعد ماجاي


    بعد ماجاي !!


    من ياصوت أصيحك ؟


    والصدى ايجاريك


    واكلك : مكدرت 00 يالتكدر ابلياي
    [/align]
    [align=center] (`'•.¸(` '•. ¸ * ¸.•'´)¸.•'´)
    « ´¨`.¸.* أمـانـاً يـاعـراق *. ¸.´¨`»
    (¸. •'´(¸.•'´ * `'•.¸)`'•.¸ )

    [/align][align=center] [/align]

  2. #2
    الصورة الرمزية خادمة الزهراء
    خادمة الزهراء غير متواجد حالياً مشرفة واحة التربية والتعليم والاسرة
    تاريخ التسجيل
    Nov 2003
    المشاركات
    1,884

    افتراضي

    [align=center]السلام عليكم
    عودة أخرى مع الشاعر : عريان السيد خلف

    لاتجينه
    لاتجينه 00 لاتجينه !!

    جان كلت : ابو حبه الأبيض

    غير معشركم لكينه

    جينه مشتاكين

    وبلهفه

    او تسد بابك علينه

    جينه يدفعنه الهوى 00 اودمعاتنه اتكطر بدينه

    او جنت اظن عندك وفه

    او روحيته


    من فرد طينه

    غمكت جرح الجفه

    او زدت


    الكلب ونه لونينه

    اعتب اعله الروح 00 جي لنها اعله ريحتكم حنينه

    واتب اعله الشوك 000 والعشرة اوسوالفها الحزينه


    علمتني اشلون يتبره

    الخوي

    او حمل اليكع محد يعينه


    عفيه صحبة هالوكت



    بيها اليجافي



    اشوكح عينه !!


    اولا تجينه 00!!


    - ما اجيكم



    واليدك بابك 0 بعد تنشل يمينه


    اوجينه


    مدري الجدم زل بينه اعله دربك



    لوعمينه


    اوجيت ارد روحي

    البكت سنتين

    بديارك رهينه

    او جني ضيف !

    اوعادة الينضاف

    للخطار

    يرخص ماي عينه

    وانته

    ماجنك ربيت ابماينه

    او شارب حنانه

    وانكرت حتى العرف

    يوم الوكت

    بيدك رمانه

    عفيه كلبك هلبت ابساعة
    وفيه

    وبالك طرانه

    اوجينه نشجيلك

    عذاب اجروحنه

    او لوعة هوانه

    آخ 00 يا دمعك فلا يبطل

    يهل


    لمن عمانه

    ياعفه اكلوب التشيل

    الظيم

    وشنحمل عفانه


    اوحتى اعز الناس من طحنه

    ابهظم

    جاروا علينه

    اومن وصيلنه لدارهم كالوا :


    اشجابك ؟

    لاتجينه !
    عفيه صحبه هالوكت
    بيها التجافي

    اشوكح !

    عينه
    [/align]
    [align=center] (`'•.¸(` '•. ¸ * ¸.•'´)¸.•'´)
    « ´¨`.¸.* أمـانـاً يـاعـراق *. ¸.´¨`»
    (¸. •'´(¸.•'´ * `'•.¸)`'•.¸ )

    [/align][align=center] [/align]

  3. #3
    الصورة الرمزية خادمة الزهراء
    خادمة الزهراء غير متواجد حالياً مشرفة واحة التربية والتعليم والاسرة
    تاريخ التسجيل
    Nov 2003
    المشاركات
    1,884

    افتراضي

    [align=center]تــل الـورد
    عاتبني ابعتابك خل ترد روحي


    اوهسني . . ابدلالك . . ياشتل شمام


    حتى ازهك . . وشوفك وينها اجروحي


    بيه اشبع غرورك . .



    يا أعز جتال



    يتمايل غنج لو بيه . . ثكل نوحي

    تعاتبني اعله حالك . .
    صار بيك الصار
    جاشدل اجروحك هاي وشتوحي
    كبل حبك . . جبل مالاح طرفي السيل

    هسه اول زخاخ

    ايغطن سفوحي !
    ومنك ماروت يدعج بعد روحي
    ولا رادت . . ولاسمعت . . ولاحبت
    لاتحمل ((نجاة)) ابليل لوغنت
    اعلمها الورع . . واطبك عليها الباب

    تذكر ضحكتك . . واجهرت ماعنت

    لا لامتك ليش . . وشوفك اصبح طيف

    اشلون ابعدت عنها . .

    اشلون ماجنت !
    وعيونك ابغير عيونها اتهنت
    وجفوفك ابغير اجروحها اتحنت
    يا تل الورد . . تل آخر السباح
    حته اطفه . . من اشوف ارويحتي انتلت

    كلت انجفه الماي . .
    وذبل عود الياس
    والوادم نست

    وبغيرنه اتسلت
    وأول ما شفت طولك نسيت الصوت

    وروحي بلاسبب بجفوفك افتلت
    ياكمرة حياتي البعد ما هلت . .
    يا انت . . وكفاني اتوهدنت وياك
    تحسبني . . وحسبتي وياك ما فلت
    كلمن عرف وشره . . وشال منها الشال
    وتعده العمر والوادم اندلت
    هسه الراح راح . . وبين ايديك الروح
    بس ذمه ابركبتك يوم لو سلت
    [/align]
    [align=center] (`'•.¸(` '•. ¸ * ¸.•'´)¸.•'´)
    « ´¨`.¸.* أمـانـاً يـاعـراق *. ¸.´¨`»
    (¸. •'´(¸.•'´ * `'•.¸)`'•.¸ )

    [/align][align=center] [/align]

  4. #4
    الصورة الرمزية خادمة الزهراء
    خادمة الزهراء غير متواجد حالياً مشرفة واحة التربية والتعليم والاسرة
    تاريخ التسجيل
    Nov 2003
    المشاركات
    1,884
    [align=center] وأخيراً نختم لشاعرنا
    عريان السيد خلف
    بـــقصيدة صوتية


    أرحموني

    http://hussamaliraq.com/sh3er%20sha3...lf/Ar7mone.ram[/align]
    [align=center] (`'•.¸(` '•. ¸ * ¸.•'´)¸.•'´)
    « ´¨`.¸.* أمـانـاً يـاعـراق *. ¸.´¨`»
    (¸. •'´(¸.•'´ * `'•.¸)`'•.¸ )

    [/align][align=center] [/align]

  5. #5
    تاريخ التسجيل
    Jul 2004
    الدولة
    هناك
    المشاركات
    28,205

    افتراضي

    عاشت ايدج عزيزتي
    رواد الشعر الشعبي كثيرون بعضهم غير مشهورين اعلاميا اتمنى ان يشارك الجميع بما يملكوه من معلومات عن كل الشعراء

  6. #6
    الصورة الرمزية خادمة الزهراء
    خادمة الزهراء غير متواجد حالياً مشرفة واحة التربية والتعليم والاسرة
    تاريخ التسجيل
    Nov 2003
    المشاركات
    1,884
    اقتباس المشاركة الأصلية كتبت بواسطة منازار مشاهدة المشاركة
    عاشت ايدج عزيزتي
    رواد الشعر الشعبي كثيرون بعضهم غير مشهورين اعلاميا اتمنى ان يشارك الجميع بما يملكوه من معلومات عن كل الشعراء
    وأنا اضم صوتي لصوتك وهذه دعوه للجميع لكي نرفد هذا الموضوع بأسماء وقصائد الشعراء الشعبين ..
    وتسلمين لهذه الطله ...
    [align=center] (`'•.¸(` '•. ¸ * ¸.•'´)¸.•'´)
    « ´¨`.¸.* أمـانـاً يـاعـراق *. ¸.´¨`»
    (¸. •'´(¸.•'´ * `'•.¸)`'•.¸ )

    [/align][align=center] [/align]

  7. #7
    الصورة الرمزية خادمة الزهراء
    خادمة الزهراء غير متواجد حالياً مشرفة واحة التربية والتعليم والاسرة
    تاريخ التسجيل
    Nov 2003
    المشاركات
    1,884

    افتراضي

    [align=center]وهذه رائعة من روائع الشاعر عريان وهي في ديوانه المعروف ( الكمر والديرة )



    (( نــذر))


    ليس عندي غير روحي
    وكانت .. وتبقى نذرا


    ادك روحي .. نذر للجايب ابشاره
    واورجه اعله الجروح ، المالهن جاره
    جرح ينزف .. جرح باني .. اعله بسماره –
    خجل .. والمايخاف اللوم..
    يرضه ابذلته وعاره
    يالمبشر ..مته المكَصوص جنحه ايطولن اكَصاره ؟
    ومتى الوكت التراده ، ايبدل اطواره
    ومتى العايش غريب ، ايأمن ابداره ... ؟
    يالمبشر .. ممحله الروح ..
    غيمك .. عزّت امطاره
    اوجثيره المايهزها الضيم ..
    جن اكَلوبها حجارة
    ولو لذة عشيج الموت ..
    كَلبه .. ايموت بسراره
    لجن ، شانت على المذبوح ..
    دمه .. ايضيع فجّاره
    دَفك عينك ، زمانك ليل ..
    ليل .. ايريدله انطاره
    ولا كلشي الجليته ايطيح زنجاره
    ولا كلمن يموت ايضيع تذكاره
    هلبت .. مات (جيــــفاره .. ؟)
    اوهلبت .. (هوشي منه ) انكَطعت اخباره ..؟
    عمت عين الوجاغ الماتشب ناره
    ولو دنياك غداره
    ولو .. جرحك ..
    جرف تعبان .. تغفه الآخ باكتاره
    لجن .. بيه العتب شاره
    امن اشوفن : دانك السفان
    .. صار الروج .. حدّاره
    يهلتشبر ، خيال الليل ..
    وترد كَاصره اشباره
    اعله هونك .. بيه الك حسبات
    كلها اغيوم مطاره ابدمع ،
    يا دمعة المهظوم ..
    ما تعتاز .. تسياره
    يناري .. المالجم عاره
    اعله هونك .. من يهاب السيل ..
    لو ينخاض تياره
    اعله هونك .. من تربّه اهلال
    .. غطت غيمته انواره
    دَذر ، جرح الصبر بارود ..
    خل يتباهن اكتاره
    يبارغ .. من تضيف الموت ..
    يخشى الموت .. خطاره
    آنه الجرحك .. عشت مجروح ..
    وانته .. ابعشر معشاره
    الم بيه الوجع نيشان ثاير ..
    ما يرد ثاره
    واهزك هزة المطعون ،
    من تتلايم اكتاره
    اعله وكتك والوكت مشوار ..
    غمّه الباع مشواره
    واداري العيب تتداره
    اداري العين .. وانته العين ..
    والدم .. اورفيف الدم
    اداري الآه .. انته الآه ..
    وانخه الروح .. لا تهتم
    اداري الحيف .. كل الحيف ..
    ظل بيك الحلم .. يحلم
    اداري اوكَضت روحي انذور ..
    لاوِد لا شمل يلتم
    يهاوي الروح غم الروح
    كون ابشان ما تحلم
    يباجي العين ..
    ذل العين بالدمعات تتوشم
    هظم والشال هظم الناس لوجّه الموت ما يندم
    لَوَن .. شحت دموع الغيض ..
    خل دمع العتب .. يلتم
    ندامه ، اعله الشرف ..
    ينداس والداس الشرف .. يسلم !؟
    ندامه ، اوعزّة المندوم ..
    وكت الثار .. يتحزم
    فشك .. والمافهم معناك ..
    بزمور التفك .. يفهم
    او جرعنه .. اشجم شكل علكَم .... ؟!
    وِنِت طيف المحبه .. اوشوك الولايه
    انت .. زخات غيمه .. ابكَاع صبخايه
    يشاتل بالكَلب دايات .. دايه اتلوب .. من دايه
    يبو الشط التعيش اوياك .. قصته .. طينته .. اومايه
    اشتكَل لمشذبات الروس .. لوجن ليك .. شجايه ..
    اشتكَل للطاح .. بين ارماح .. كلها اوياه كَصايه .. ؟
    اشتكَلي ؟ .. اوبيك روحي اتموت
    وترد .. بيك تتحايه
    ابرجاها ولو كسرها ايجيد ..
    تصرخ وين جباره .. ؟
    اوثكَلها .. اوعادة المضهود .. بالمعبار .. يتباره
    ولو .. جرحك جرف تعبان .. تغفه الآخ .. باكتاره
    لجن .. شانت على المذبوح .. دمه يضيع فجاره
    [/align]
    [align=center] (`'•.¸(` '•. ¸ * ¸.•'´)¸.•'´)
    « ´¨`.¸.* أمـانـاً يـاعـراق *. ¸.´¨`»
    (¸. •'´(¸.•'´ * `'•.¸)`'•.¸ )

    [/align][align=center] [/align]

  8. #8
    الصورة الرمزية خادمة الزهراء
    خادمة الزهراء غير متواجد حالياً مشرفة واحة التربية والتعليم والاسرة
    تاريخ التسجيل
    Nov 2003
    المشاركات
    1,884

    افتراضي

    [align=center] مظفر النواب....
    أحد عباقرة الشعر الشعبي العراقي...
    كتب الشعر الفصيح ...وشعر الأغنية....
    وإليكم إحدى روائعه....




    مظفرالنواب

    زرا زير البراري

    حن ....



    وانه حن

    و أنحبس ونه....
    ونمتحن
    مرخص بس كبة الدمع
    شرط الدمع
    حدة الجفن
    **********
    جفنك جنح فراشة غض
    وحجارة جفني وما غمض
    يلتمشي بيه
    وبه نبض
    روحي على روحك تنسحن
    حن بويه حن
    ***********
    عيونك
    زرازير البراري
    بكل نشاط جناحها
    بعالي السحر
    والروح مني
    عوسجة بسر
    ما وصل ليه النده
    ولا جاسها بكطرة مطر
    وصفولي عنك بالنباعي تفيض
    وتعنيت ليله ... وبه الكمر
    وصفولي عنك كل مسامة تفيض
    منك عطر .. يلحسنك نهر
    تنزل بصدري وبه النفس وبدمي
    غصبن تنعجن
    وأشهك وأصعدك للسمة
    بحسرات وبعنة حزن
    حن ... بويه حن
    **********
    شفافك ولا كولن ورد .....
    عنابه معكودة عكد
    تمتلي بكد ما تنمرد
    لا هو دفو لا هو برد
    ***************
    سكتاتك تشكل خواطر بالكلب ...
    مالي عرف بيهن كبل
    مبروم بره الريزة
    يا ريان ومخوصر خصر
    لف العكل
    كل جملة منك ...
    نبعة ريحان .. بالدلال ...
    ما تحمل ثكل
    وصفولي عنك
    وردة القداح ريش جناح
    زاهي بالسحر
    وصفولي عنك
    شال منك غيظ بستان الورد
    والنرجس الرايج سكر
    حني بفوازير ولحن ...
    حنة حمامات السجن
    حنة إلي ...
    حنة إلك ...
    واللي يعجبه خلي يحن
    حن بويه حن
    *************
    آنه من أشوفك
    يمتلي الامضي الجدب
    زهرات بيض من الوفه
    وروحي سواجي من الحنين تصير
    وأنتبه وكت بيه غفه
    يا محجل إن بيه ردود
    أرد أردود للعشرين ....
    من عمر الجفه
    وأنصف عمر منك
    نصفته بالهجر ...
    والهجر منك ما كفه
    حتى الهجر يا روحي
    منك ما كفه
    وكلبي عله هجرك كام أيحن
    حن ... بويه حن ... حن ....
    وآنه حن
    وأنحبس ونه ...
    ونمتحن
    مجبور أرخصك على الدمع
    شرط الدمع يجوي الجفن
    [/align]
    [align=center] (`'•.¸(` '•. ¸ * ¸.•'´)¸.•'´)
    « ´¨`.¸.* أمـانـاً يـاعـراق *. ¸.´¨`»
    (¸. •'´(¸.•'´ * `'•.¸)`'•.¸ )

    [/align][align=center] [/align]

  9. #9
    الصورة الرمزية خادمة الزهراء
    خادمة الزهراء غير متواجد حالياً مشرفة واحة التربية والتعليم والاسرة
    تاريخ التسجيل
    Nov 2003
    المشاركات
    1,884

    افتراضي

    [align=center]وهذه رائعة أخرى من روائع الاستاذ مظفر النواب ...

    الريل وحمد
    00000
    مرّينه بيكم حمد ، واحنه ابقطار الليل
    واسمعنه ، دك اكهوه ..
    وشمينه ريحة هيل
    يا ريل ..
    صِيح ابقهر ..
    صيحة عشك ، يا ريل
    هودر هواهم ،
    ولك ،
    حدر السنابل كطه
    *
    يا بو محابس شذر ، يلشاد خزامات
    يا ريل بللَّه .. ابغنج
    من تجزي بام شامات
    ولا تمشي .. مشية هجر ..
    كلبي ..
    بعد ما مات
    وهودر هواهم ،
    ولك ،
    حدر السنابل كطه .
    *
    جيزي المحطة ..
    بحزن ..
    وونين ..
    يَفراكين
    ما ونسونه ، ابعشكهم ..
    عيب تتونسين
    يا ريل ..
    جيّم حزن ..
    اهل الهوى ، امجيمين
    وهودر هواهم ،
    ولك ،
    حدر السنابل كطه
    *
    يا ريل ،
    طلعوا دَغَش ..
    والعشق جذابي
    دِك بيّه كل العمر ..
    ما بطفه عطابي
    تتوالف ويه الدرب ،
    وترابك ..
    ترابي
    وهودر هواهم ،
    ولك ..
    حدر السنابل كطه
    *
    آنه ارد الوك الحمد .. ما لوكن لغيره
    يجفّلني برد الصبح ..
    وتلجلج الليره
    يا ريل باول زغرته ..
    لعبته طفيره
    وهودر هواهم ،
    ولك .. حدر السنابل كطه
    *
    جنْ حمد ..
    فضة عرس ..
    جن حمد نركيله
    مدكك بي الشذر ،
    ومشلّه اشليله
    يا ريل ..
    ثكل يبويه ..
    وخلِ أناغيله ،
    يمكن أناغي بحزن منغه ..
    ويحن الكطه
    *
    كضبة دفو ، يا نهد
    لملمك .. برد الصبح
    ويرجفنَك ، فراكين الهوه ... يا سرح
    يا ريل ..
    لا .. لا تفزّزهن
    تهيج الجرح
    خليهن يهودرن ..
    حدر الحراير كطه
    *
    جن كذلتك ..
    والشمس ..
    والهوه ..
    هلهوله
    شلايل بريسم ..
    والبريسم إله سوله
    واذري ذهب يا مشط
    يلخلك .. اشطوله !
    بطول الشعر ..
    والهوى البارد ..
    ينيم الكطه
    *
    تَو العيون امتلن ..
    ضحجات .. وسواليف
    ونهودي زمّن ..
    والطيور الزغيره ..
    تزيف
    يا ريل ..
    سيّس هوانه ،
    وما إله مجاذيف
    وهودر هواهم ،
    ولك ..
    حدر السنابل كطه .
    [/align]
    [align=center] (`'•.¸(` '•. ¸ * ¸.•'´)¸.•'´)
    « ´¨`.¸.* أمـانـاً يـاعـراق *. ¸.´¨`»
    (¸. •'´(¸.•'´ * `'•.¸)`'•.¸ )

    [/align][align=center] [/align]

  10. #10
    الصورة الرمزية خادمة الزهراء
    خادمة الزهراء غير متواجد حالياً مشرفة واحة التربية والتعليم والاسرة
    تاريخ التسجيل
    Nov 2003
    المشاركات
    1,884

    افتراضي

    [align=center]وهذه رائعة من روائع الاستاذ مظفر النواب ...[/align]

    [align=center]جرس عطله ..!

    000000
    مالَه أحٌد شغُل بيه.. جرس عطله
    حيل أدكَ نوبات وحدي !!
    أبجي وحدي .. أحجي وحدي
    آخذ المدرسه عُرض إبطول وحدي
    أطفه وحدي بلايه أحٌد وأشتعل
    جرس منٌي وبيٌه وحدي أشتُغُل
    كَِلتْ أكَضي الظلٌنْ امن ايامي
    أتفرٌج
    امنْ الشباج عالدنيه وهلها
    ولَنْ بالشبيبيج الكَبالي إتِلَجلَجْ
    كَامَه من بَلوٌر
    شِكلَتني إمنْ عيوني شَكِلْ!!
    غَمٌضيتْ إبربع جَفٌي
    وبثلثْ ترباع شفت الدنيه مزروعه كُفُر
    مشمش حلو ..
    ورمان ...
    وفَر بيه الخِصِر فرٌة حِجِلْ !!
    صِحِتْ سبحانَك شَكَلٌكْ ؟ ؟
    كُفُر .. وجَنٌه .. وشِتا
    وصيف .. وربيع
    إبجَسَد واحد
    مِنْ سمَعني المشط من إبعيد
    إتمَركَص إتمُركَص عالهَوه
    وعضٌاني ..
    بسْ عضٌة طفل
    عَضْ بعَد .. عَض بعد
    يابَعَد روحي
    تلفَنتْ للجنٌه من شبٌاجَك الجدٌام بيتي
    وبالغَلَط فَرٌيت رقم النار بيٌه
    فُر بعَد .. فُر بعَد
    بس فُر عَدِلْ
    مالَه أحٌد شغُلْ بيٌه
    جرس عطلَة صيف ومتاني المدارس
    أدِكَ وحدي بلكن إيكَطعَنْ العطله
    ويشتِهَن دكَاتْ كَلبي
    كِل كَصيبه إتكَلٌك آنه
    وكل خصِر محبَس عرس ويكٌَلٌك إلبَسْ
    وإنته نازع نفسَك إمن إزمان
    وتلملم سَكتٌكْ
    جيت للدنيه نزِلْ .. ومسافر ألله وياك
    للسلطه نزِلْ
    ياجَرس يالعِشتْ وحدَك
    ساكت امن ايام ماواحد يسمعَكْ
    تعَبْ ؟ ؟ لو مَلٌيتْ
    لو رنٌاتك الحلوات
    ماعادَنْ بنات التكي والزعرور يلتَمٌن عليها
    ياحسافه ياجرس
    كل ساع رنٌاتك عرس
    بس الوكت كلٌشْ نحس
    كلٌشْ نحِسْ
    000000
    [/align]
    [align=center] (`'•.¸(` '•. ¸ * ¸.•'´)¸.•'´)
    « ´¨`.¸.* أمـانـاً يـاعـراق *. ¸.´¨`»
    (¸. •'´(¸.•'´ * `'•.¸)`'•.¸ )

    [/align][align=center] [/align]

  11. #11
    الصورة الرمزية خادمة الزهراء
    خادمة الزهراء غير متواجد حالياً مشرفة واحة التربية والتعليم والاسرة
    تاريخ التسجيل
    Nov 2003
    المشاركات
    1,884

    افتراضي


    المشاهدات لهذا الموضوع 1,547
    واخر مشاركة لخادمة الزهراء بتاريخ 02-06-2008 14:51
    !!!!!!؟؟؟؟؟؟؟؟

    على العموم نعود لهذا الموضوع بشاعر شعبي اخر ..
    وهو

    الشاعر كاظم إسماعيل اﻠﮔاطع رائد من رواد الشعر الشعبي العراقي

    الشاعر كاظم إسماعيل اﻠﮔاطع انحدر من الجنوب وتلحف في بردي الاهوار ، وظلت رائحة الأرض تعبق بأجواء قصائده التي نظمها في مدينة الثورة ، كانت بداياته الشعرية الاولى ردود أفعال لفشل تجربة عاطفية إنسانية ، لفتى شاب كان يمارس رياضة كرة القدم ، فكتب أول قصيدة بعنوان [ انتهينه ] في 1967 ، والتي جعلته يقف إلى جانب الشعراء المعروفين في مدينة الثورة ، أمثال الشعراء عريان السيد خلف ، وجمعة ألحلفي ، وكريم العراقي ،. وقد سهل عليه التردد على مقهى (الميثاق) في مدينة الثورة ، في التعرف على الشعراء شاكر السماوي وعريان السيد خلف وجمعة الحلفي وآخرين.
    تعلم كاظم إسماعيل الكاطع من مدرسة الحياة ، الكثير والكثير من القيم والمعاني الإنسانية التي جسدها في قصائده ، ومثله مثل كل الأدباء والشعراء والفنانين والمثقفين من ابناء الشعب العراقي ، من الديمقراطيين واليساريين و الوطنيين ، الذين حاصرتهم الدكتاتورية و تعرضوا إلى الملاحقة والاستجواب والاعتقال لإجبارهم على التخلي عن خياراتهم الفكرية والسياسية ولتعطيل ابداعهم الإنساني، و تم سحقهم تحت جنازير الإلة البربرية السلطوية التي لاترحم ، ولم تكتف هذه السلطات بمنعهم من مواصلة مسيرتهم الإبداعية الوجدانية وحسب ، بل دفعت البعض منهم إلى الانزواء بعيدا عن الاضواء، و قبل البعض الأخر الاستمرار في ممارسة لعبة (القط والفأر) على مضض من خلال الاختفاء والظهور والابتعاد عن عيون الفضوليين من اعوان النظام ، و ظل الجلادون ممسكون برقاب الكثيرين منهم يسحبونها ويشدونها متى شاؤا، مواصلين اذلالهم وتحطيمهم لكل ماهو ادمي وانساني في تكوين الشخصية الوطنية العراقية .

    وقد عملت الديكتاتورية و مؤسساتها على وضعهم على حافة الشظف والفاقة ،مما دفعهم إلى مزاولة مختلف الأعمال لضمان استمرار حياة عوائلهم واطفالهم ، وكانت عملية محاربة الإنسان العراقي في رزقه اليومي وقوته ، هي واحدة من أبشع الوسائل التي ورثتها الديكتاتورية الفاشية الصدامية من تجارب الأنظمة الدكتاتورية الشمولية ، ولم تتوان إلة الأعلام الدكتاتورية الحربية ومؤوسساتها القمعية عن خنق ووأد إي نفس وطني عراقي ، مضيفة حصارا أخرى للحصار الذي يتعرض له الوطن الشعب العراقي .

    وعلى الرغم من كل هذه التجارب العامة المؤلمة والتجارب الشخصية المريرة التي عانى منها الشاعر كاظم إسماعيل اﻠﮔاطع ، الاانه ظل يطارد الحلم بين خيوط الدخان المتصاعدة من بيوت الفقراء الكادحين بمدينة الثورة المترامية الأطراف التي تحلم بغد أفضل كباقي المدن العراقية .

    أصدر كاظم اسماعيل اﻠﮔاطع، ديوانه الاول في عام 1968 ،و كتب في تلك الفتره واحدة من أجمل قصائده الشعبية التي كانت بعنوان (لو نمشي طول العمر) والتي غناها الفنان سعدون جابر والمشهورة باسم ( اللي مضيع ذهب ) ، والتي عالج فيها الشاعر لأول مرة الغربة في مطلع السبعينات فكتب يقول :

    بالغربهْ شِفت التَعب وإتعلٌمت معناه

    وإتعلٌمت عالسهرْ .. والسكتهْ .. والصفناهْ

    ذلٌيت ذلْ النهر من ينكَطع مجراهْ

    وإعرفت كل شي إعرفتْ

    حتىٌ النخلْ ينحني لريح السفرْ من يجي

    وجايب غريب إوياهْ

    ألله !! يا هالوطن شمسٌوي بيٌه ألله

    نيرانه مثل الثلجْ

    كلما تدكْ عالضلعْ

    أبرد وكَول إشٌاهْ

    إللٌي إمضيٌع ذهب!!

    بسوكَ الذهبْ يلكَــــــاهْ

    وإللي مفاركْ محبْ ...

    يمكن سنهْ وينســــــاهْ

    .. والطاح منٌه الكَلبْ

    قلب إصطناعي إنلكًه ويشكٌلونه إهنـــاهْ

    بس إل مضيٌع وطــــــــــــــنْ

    وين الوطن يلكَـــــــاه ؟ ؟ ؟


    في هذه القصيدة الشعبية التي انتقى شاعرنا بعناية كلماتها العامية البسيطة السهلة الفهم على المتلقي ،يحاول من خلالها الشاعر رسم العديد من الصور المتداخلة التي تمثل الحالة الوجدانية للمغترب وعملية ارتباطه بالوطن ، والتي تمثل ارتباط النهر بمجراه ، ومن ثم انتقل الشاعر إلى صورة أخرى تمثل هول الغربة وثقلها ، الذي يمثله انحناء النخيل لريح السفر ، وعبر هذه الصور نقلنا الشاعر كاظم إسماعيل من خلال تتشبيهه الجميل إلى عالم الواقع واحداثه اليومية ، فتجده يشبه ألالام واحزان الوطن ، بالنيران التي تشبه الثلج الذي يلامس اضلاعه فيرتجف من البرد ، ، هذه الصورة توضح علاقة الإنسان بهويته وعنوانه الوطني، لقد ابدع الشاعر أﻠﮔاطع في تصويره للحالة الإنسانية للمهاجرين والمغتربين العراقيين ، من خلال هذه الصور الشعرية الجميلة ليفك عبرها طلاسم الارتباط الشديد بين المواطن والوطن ،من خلال تعريف شعري مبسط للهوية الوطنية .

    آه ياوطن يا خبز يالشارتك تكتل !!

    آه يا وطن يا طفل ..

    هِنياله منْ صاغ إلك نبض الكَلب جنجل !!

    يا وطن .. زٌفة كَمر

    ياعراق زَفة كَمر

    ونجوم إلهْ إتهلهلْ !!

    عذبٌني ما عذبٌك ..

    إكتلتني ما أكتلك ..

    طبع اليحب ينكتل موش اليحب يكتل


    ولنا وقفات اخرى مع هذا الشاعر إن شاء الله
    [align=center] (`'•.¸(` '•. ¸ * ¸.•'´)¸.•'´)
    « ´¨`.¸.* أمـانـاً يـاعـراق *. ¸.´¨`»
    (¸. •'´(¸.•'´ * `'•.¸)`'•.¸ )

    [/align][align=center] [/align]

  12. #12
    تاريخ التسجيل
    Aug 2008
    المشاركات
    4,251

    افتراضي

    السلام عليكم ورحمة الله وبركاته :

    أتمنى بعودتكم ان يعود الاخضرار والتالق لهذه الصفحات التي عذبها الغياب

  13. #13
    الصورة الرمزية خادمة الزهراء
    خادمة الزهراء غير متواجد حالياً مشرفة واحة التربية والتعليم والاسرة
    تاريخ التسجيل
    Nov 2003
    المشاركات
    1,884
    اقتباس المشاركة الأصلية كتبت بواسطة احمد14 مشاهدة المشاركة
    السلام عليكم ورحمة الله وبركاته :

    أتمنى بعودتكم ان يعود الاخضرار والتالق لهذه الصفحات التي عذبها الغياب
    وعليكم السلام ورحمة الله وبركاته..
    حياكم الله أخ احمد..
    هذه الصفحة تتألق بحظوركم وحظور البقية من الأخوة الطبين ..
    وإن شاء الله ما نقصر اذا اسعفنا الوقت لرفد هذه الواحة من مشاركات ..
    وهمتكم ويانا ..
    تحياتي ..
    [align=center] (`'•.¸(` '•. ¸ * ¸.•'´)¸.•'´)
    « ´¨`.¸.* أمـانـاً يـاعـراق *. ¸.´¨`»
    (¸. •'´(¸.•'´ * `'•.¸)`'•.¸ )

    [/align][align=center] [/align]

  14. #14
    الصورة الرمزية خادمة الزهراء
    خادمة الزهراء غير متواجد حالياً مشرفة واحة التربية والتعليم والاسرة
    تاريخ التسجيل
    Nov 2003
    المشاركات
    1,884

    افتراضي

    نعود لشاعرنا
    كاظم إسماعيل اﻠﮔاطع
    وما تكتبه للوطن

    آه يا وطن يا جَذِر !!

    والجذر هم بيه طبع ..

    لو مات من العطش للوادي ماينزل !!

    علٌمني إل فراﮒ

    أعزف لحن غربتي إبقيثارة أشواﮒ

    أسهر \ وحن\ وأنفعل

    وأتمنىٌ واشتاﮒ

    مامش مثل ديرتي

    لو نمشي طول العمر !!!

    ماﺘﻠﮔه مثل إعراﮔنا إعراگ !!!


    لقد استخدم الشاعر الموروث الشعبي ووظفه ببراعة في قصيدته ، من خلال علاقة الجنجل بالطفل وهي عادة قديمة يعرفها ابناء الريف والمدينة معا ،و كذلك من خلال تصويره (الزفة) العرس ، و استعارته للكمر العريس الذي تهلهل له النجوم ، وهي لازمة شعبية يرددها الجنوبيون والعراقيون حين يزفون العريس إلى عروسه، بقولهم ( ونجومه يمك ﻴﮔﻤر ) ، وعبر هذه الصور السريعة ينقلك الشاعر بشكل سلس عبر بانوراما لصور جميلة ومؤلمة يتذكر فيها الشاعر الوطن الذي يظل مرتبط به كارتباط الجذز بالارض ، وعلى الرغم من كل معانانته الإنسانية ولكنه لم يجد مثل عراقه ( الوطن) ، عراق اخر بديل عنه في المنافي والمهجر .
    لقد حاول الشاعر إيصال صوته للمتلقي ليس من خلال تمسكه بالمفردات الشعبية القديمة، بقدر ما عمل على تطويع اللغة العامية المحكية في قصيدته المصورة التي افردت له مكان خاص في عالم الشعر الشعبي العراقي ، وظل يبحث في قاموس العامية الدارجة عن الكلمة المتداولة لكتابتها في قصائده ، لتصبح مفهومة لابناء المدينة الذين تصعب عليهم مفردات الحسجة القديمة .

    وفي قصيدة (ملفته للإنتباه) ، يحاول الشاعر كاظم إسماعيل عبر هذا الوصف الجميل ، إن يحمل بيده ريشة الرسام الذي يرسم بانامله الرقيقة لوحة لحبيبته تعبر عن وجدانيته وعواطفه الإنسانية ، وهو من جديد يستعير التشبيه للجمال الالهي ، من خلال صورته الشعرية الجميلة (وبالرسم طوٌل خلكَ بيــج الإلــه ) ، ثم ينتقل بنا أيضا انتقاله سريعة وهو يحمل كامرته ليصور المشاهد و يرصد حركة إبطاله على مسرح الإحداث، مقربا الصور تارة ويبعدها ترة أخرى( من بعيد إنتي جميله !! .... من قريب إنتي
    جميله !!)


    مثل شبوي المسه بعطره وشذاه

    حبـٌه.. حبـٌه وكَطره .. كَطره

    وبالرسم طوٌل خلكَ بيــج الإلــه

    صوٌر عيونج مواني

    وبيها عاف الليل نومه وذب غطــاه

    من بعيد إنتي جميله !!

    من قريب إنتي جميله !!

    واكَفه .. تمشين حلوه

    والحلو وجهه يبيٌن من كَفــاه
    [align=center] (`'•.¸(` '•. ¸ * ¸.•'´)¸.•'´)
    « ´¨`.¸.* أمـانـاً يـاعـراق *. ¸.´¨`»
    (¸. •'´(¸.•'´ * `'•.¸)`'•.¸ )

    [/align][align=center] [/align]

  15. #15
    الصورة الرمزية خادمة الزهراء
    خادمة الزهراء غير متواجد حالياً مشرفة واحة التربية والتعليم والاسرة
    تاريخ التسجيل
    Nov 2003
    المشاركات
    1,884

    افتراضي

    كتب الشاعر العديد من قصائد الرثاء ، فقد رثى زوجته زكية وابنه حيدر ، وصديقه الشاعر كاظم ألركابي، والفنان رياض احمد ، وتعتبر مرثية زوجته زكية واحدة من قصائده الإبداعية ، التي جاءت ضمن مجموعته الشعرية (غاب اﻠﮔﻤﺭ ) 2004المهداة لزوجته زكية .. كتب في قصيدة
    (القلب).. يقول :
    ما ذكرتج الا والدمعات صبت
    ما ذكرتج.. الا والسهلات صعبت
    عود سيجتج بروحي
    والمنايا اعليج مدري شلون طبت


    وفي مقطع التالي من القصيدة يكتب الشاعر بلغة الرواي الحوار الذي دار بينه وبين الدفان المعفر بتراب القبور ، والمنبعثة منه رائحة الموت ، حيث يقول :

    زكية احجيت قصتها على الدفان
    لكن بالحجي الدفان ما صدﮒ
    يا ﮔﺍع النجف وشكثر بيج اسرار
    نحسدهه الصبرهه اشعجب ما تزهگ
    ممصدگ غرفتج تبقى كلها اتراب
    واخشاب العرس تابوت الج تندگ

    لقد جسد الشاعر عبر صوره الشعرية المكان بكل تفاصيله ، بتصويره عملية الدفن و تفاصيل المقبرة و تحملها أعباء الحفاظ على اسرار ساكنيها الذين يعدون بالملايين في مقبرة النجف الاشرف ، وبينما كان الشاعر يسير بين القبور في النجف الاشرف وهو يحمل نعش زوجته ، استعاد في مخيتلته تفاصيل غرفتها في بغداد ، ليجد نفسه وسط غرفة زوجته التي يغطيها التراب بعد رحيلها عنه إلى العالم الأخر، واستطاع الشاعر عبر مخيلته الشعرية استعادة تفاصيل الصدمة وحالة الذهول التي انتابته برحيل زوجته ، وهي عملية معقدة استطاع الشاعر اﻠﮔﺍطع عبر تمكنه من أدواته توظيف العديد من الصور الشعرية المتميزه للخوض في تفاصيل هذه الحالة الإنسانية .
    إن الشاعر في انتقالاته عبر تفاصيل المكان يجعلك تتصور انك تتابع لقطات من مسلسلل تلفزيونيي يعرض عليك تفاصيل تشيع جنازة حيث تدخل إلى المقبرة لدفنها ، وهو يعرض لقطات لمكان ( المقبرة ) من أماكن مختلفة .

    اما في مرثية ولده حيدر ... والتي غناها المطرب العراقي الكبير فؤاد سالم ، تجد الشاعر كاظم إسماعيل ، يكتب واحدة من أجمل قصائده التي تجسد سعة مخيلته في تصوير موضوعة القصيدة ، والتي أسماها ( مرثية العام الدراسي ...حيدر ) .
    بدى العام الدراسي وبدت الهموم
    وبيتي عالمدارس بابه صاير
    نسيت ...وداعتك جيت اشتري هدوم
    الك ...ومحضر اقلام ودفاتر
    مو تسمع قيام ...وليش ماتكَوم؟
    ومر اسمك ولا من كَال ...حاضر
    الشمس طلعت علينا...مو وكت نوم
    وهم عدكم صبح يا اهل المكَابر
    وهم عدكم ...ضوه ...وشباج ...ونجوم
    وهم ينطونكم واجب ال باجر ؟

    عبر هذه الصور الشعرية يتجاهل الشاعر موت ولده حيدر، ويتعامل معه على انه حاضر معه يخاطبه ، ولكنه في الوقت نفسه يدرك ذلك الحلم ويرجع ثانية إلى ارض الواقع للقبول بهذه الحقيقة ، ولكنه يصر على إن ولده لم يبلغ لحضور المدرسة ، فيحمل اللوازم المدرسية إلى المقبرة ، ليتساءل عن حياة سكان المقابر وطبيعتها ، لقد كانت هذه قراءة سريالية لتفاصيل الموت وتداعياته وعلاقته في الزمان والمكان في قصيدة الشاعر كاظم إسماعيل .

    الوالد بالوداع يصير مهموم ...وانا اثنينهن والد وشاعر
    خيلك طشرتني وجنت ملموم ...وصارت طيحتي بين الحوافر
    اذا عشرين يوم وما شفت نوم...شيظل بالحيل بالعشره الاواخر ؟
    فراش الفاتحه لو شفته ملموم ...بنص كَلوبنا تلكَى الجوادر

    يمنه المصبغه ..ودينه لهدوم
    الحزنك مشترينه قماش حاضر
    تمنيتك جرح ...كلساع ملجوم
    وتبات الليل بشفاف الخناجر
    انا يا بوي من ونيت مالوم ...نزل مني دمع يعمي النواظر
    خدودي متعوده تتندى كل يوم ...وتحب الماي خشبات الكَناطر
    لمت الروح بس شفادني اللوم...شلحك ؟ وبسفينة الموت عابر
    المنايا عالسطح وعيونها تحوم...عليك ...ونزلتلك نسر كاسر
    ستر الله نغط بديارنا البوم...اخذ عين الكَلاده وراح طاير
    ديني حلاتك حلو الرسوم...بلكي انعشك دنيانا مظاهر
    اظل كاظم وصبري وياي مكظوم...لوما هالخشب جوه الاظافر
    اهن كاسين بهن كاس مسموم...خاف اغلط وبالمسموم اكاسر
    بعنه البيت ريت البيت مهجوم....وريت اكثر بعد من هالخساير
    تحب انت اللعب والكبر ملموم ...شلون تحملت وشلون صابر؟
    وليش من الهوى يابوي محروم ...ونسمات الهوى تطيب الخاطر
    من هو ؟ الشوفك صورة المعدوم...وليش تعلكَت ياشاب يا قاصر
    ما ظنيت زرعي يروح فد يوم ...وعصافير الحزن تگضي البيادر
    من اكتب قصيده تزيد الغيوم...ومن عيني الدمع يملي الدفاتر
    يبقى بهل مطر ياشعر منظوم...نصاري الحسين وبحر وافر
    [align=center] (`'•.¸(` '•. ¸ * ¸.•'´)¸.•'´)
    « ´¨`.¸.* أمـانـاً يـاعـراق *. ¸.´¨`»
    (¸. •'´(¸.•'´ * `'•.¸)`'•.¸ )

    [/align][align=center] [/align]

صفحة 1 من 3 123 الأخيرةالأخيرة

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •  
 
شبكة المحسن عليه السلام لخدمات التصميم   شبكة حنة الحسين عليه السلام للانتاج الفني