بايعناك( للسيد محمد باقر الحكيم قدس سره )شعر شعبي

[مشير السعيدي]

بايعناك
ــــ
ضَحَك سِن إلعِراق إبتِشَر لَمن جيت
إوفَك صَدرَه إلمظيف إوفَرش وإتلگاك
وإتراگص شَعَبنا إوهَوَس إوفَر بيك
مو بالسوط هَوَس لا لَجِل عينـــاك
وأنحَرنا إلذِبايِح وإلدِلال إتفور
إومِن بيعَت علي إلكَرار بايعنـــاك
صِمنا إسنين لله إبواجِب إلمحتاط
بَس حُبَك فَرض مولاي مِن صِمنـاك
ثَلث إعقود نِنطر نِتهِل إمن إلظيم
لَبيكم صِحِت ياليث مِن صِحنـــاك
إجيت إوراية إلعباس خَضرَه إعلى إلمتون إتلوح
إجيت إومِعتني إعلىإلموت موش إلموت إلتعَناك
نَعَم هاي إلقِيادَه إوهذا معنى إلدين
إونِعِم نِلت إلشَهادَه إوهيه مِن شَرواك
مَخبونَه إعلى غيرَك بَس عليك إتلوگ
إلعَليَه إتريد مِثلَك يالوِضَت بِدمــاك
تِظل إلرايه بيدك وإنت بالفردوس
إوتِظَل إسيوف شيعَة حيدر إبيمنـاك
إبخَط إلطاح بالطَف طِحِت لَجل إلدين
إومَنارَه إتشِع بَخَت مولاي لِليِنخـاك
إلوطن شِلتَه إبضَميرَك ياهديب إبزود
وإنتَ حسين عَصرَه إوعَهَد عاهَدناك
لأن نَفس إليَزيد إونَفِس ذيچ إلگاع
إونَفِس نَسل إلزچيَه إرتِفَع بينا إلواك
إوبارض إلطَف هِواشِم أسَرَوا لِحسين
وألِف حرَه يباقِر أسَروا بجفـــاك
بِس عِدنا عَتَب وإلعَتَب خاف إيطول
بَعَدنا إمطَشِرين إورِحِت يَم مـولاك
إوبَعدَه إيزيد يِلعَب وإلشِمِر سَياف
وإلحر مالِفاها إوبَعدَه وي إعــداك
والنَخوَه ذِليلَه إبين روج إوزور
وإلهَلهولَه خَرسَه إمچَتِفَه إبلَيـــاك
مِشِبحَه إلنَجَف چانَت وإلدَمِع تيزاب
وَحشَه إوليل دامِس بيها حَل أفـلاك
رِزحَت بين رَحَه إوطاگ سِنَه أمواس
إوصامَت صوم ماهَل فِطِر كله إمساك
وإلحَجاج بيدَه إلخيط وإلعَصفور
إبشوزَن هَد عليها إوحَوِطاها أشبـاك
ذَبَح بيها ذَبِح جَزار لو گَض شاة
إبمَخالِب ذيب عَضها إسنين عَض إوصاك
جِذبَة نِفَس لَمَن سِمعَت إبطاريك
إوبَدر تَمَت يِطوف إوي إلنَجِم بِسمــاك
إوضَوَه إلليل بيها إوبي صِرِت فانوس
إوبِشايِر خير هَلَت وإتِبَعنا إخطــــاك
أسَف جَاحِد زِمنا إوبيه شِحيح إلخير
دَگها إوخان بينا إوشالَك إلمـــــأواك
بَس إبشِر تَرانا إعلى إلعَهَد باقين
تِوَشَحنا إلسِجايَه إونِسري وي مَســـراك
إوبَشر حسين گِلَه إلشيعَه ماناسين
بِگماطَه طِفِلنا إيلولول إويِنعــــــاك
إوفِزت بينا ضمير إوبيه نِوچد إلطيب
غَم كلمَن ضَميرَه إلمافَرَه وأحـــــواك


مشير مطرب السعيدي

[أبو باسم]

الله يعطيك ألف عافية على هذه المشاركة الطيبة

وبارك الله فيك وفي اخلاصك وإيمانك

وأرجو ان تسمح لي بوضع هذا الشعر في توقيعي

مع خالص التحية

[مشير السعيدي]

السلام عليكم

شكرا لمرورك هنا في شعري

شكرا لثنائك الرائع

نعم لك ماطلبت وانا شاكرا لك ذلك


ممنون



اخوكم

مشير السعيدي