باقات من الشعر الشعبي في قضاء المجر الكبير / للشاعر علي كاظم الدرجال

[ابو نور 1949]

مثلك بالجذب ماشافت العين
ولا حسبه حلم راوتني العيون
***
رسمتك بالشوارع عالحياطين
وحفرت اسمك يالسمر بين الجفون
***
انحتك عالحجر تمثال اسويك
وركع كل وكت ويه اليركعون
***
انقشك عالحجر يسمر** ونحتك
ودوه العلتي اوصفنك** ونحتك
اذا يختل نبض كلبك** ونحتك
اجيبن كلبي سيرا بين اديه
****
واذا جابك حنينك لينه رديت
فرحي الكون كلبي ما يشيله
**
وحظنك من ترد وتسامر وياك
وشبكنك لان مابيدي حيله
**
ولانك عالبشر ما وصفك شلون
انته الناس من عندك قليله
**
ذبل جوري الورد لمن ** وصفتك
لان بيدي اعزلت شينك ** وصفتك
اذا غيري يتماشالك ** وصفتك
كبل للشط اغسل اثنين اديه
****

[نور على الدرب]

قصيدة ( ألمجر ) للشاعر علي كاظم ألدرجال ألربيعي ( أبوعمار ألربيعي )


مجر يامجرأيا مجر
ياغيمة ربيع بمطر
ياجولان زاهي بهور
يابردي وكصب أخضر
ياكحل أليضوي ألعين
ياحنه برجل لسمر
يادهله أليغطي ألكاع
ينبت رازقي وعنبر
ياتين بثنايا ألهور
كاط أوشمبلان أحمر
زهر أخضر طلع خريط
طر ألماي صار أصفر
مثل طعم ألعسل بالريك
جمار ألنخل لو طر
يبلام أليجول ألهور
كلي أبياكتر تفتر
أريد أتناك حتى هناك
نكتب دارمي بدفتر
صرت مغزل بحلك ألماي
لامخلاص لامعبر
شريعتنا كصب مضغوط
وألموكد حله أوجمر
حلم لاجن حلم تعبان
بضلوع ألكصب حشر
دجدم وأربط ألمشحوف
يابلام كلبي أنطر
تعال أكعد تدفه بنار
دار ألكوشه وأتبختر
يبلام ألمنايا أتحوم
فوك ألهور غيم أحمر
يبلام ألسفينه شراع
بس ينكسر تدمر إإ
رد مع اقتباس

[نور على الدرب]

ومن شعر المرحوم عبد النبي الزبيدي النداف في ألأبوذيه وهو والد الشاعر المعروف مطشر عبد النبي النداف ::
بهاماي :
******
ألدهر ماله كثر طكه ** بهاماي
وبقيت أنهش يخلق ألله ** بهاماي
لون أهل ألمجر هموا ** بهاماي
تشت ومابقت منهم بقيه
ومن اعلام المجرالكبير في الشعر الشعبي الشاعر كاظم نجم عبد ألله جيبون ألذي أشتهر يقصيده مغناة (( هيمت كلبي أميره )) ويسكن في الوقت ألحاضر في ناحية علي الشرقي / ميسان **
ومن أعلام المجر الكبير في ألشعر العمودي ألأستاذ المرحوم علي حسين علوان ألجبوري ألمعروف ( علي بخشه )
ومن أعلام المجر الكبير في الشعر الشعبي ألسيد جعفر ألسيد محمد ( متغرب )**
من اعداد / الشاعر والباحث علي كاظم ألدرجال( ابو عمار ألربيعي )

[نور على الدرب]

اعز مخلوق الي بدنياي والدتي
الناس بنص وهيه بنص معزتها
**
عاشرت بحياتي هاكثر ناس
ولا شفت بحياتي مثل طيبتها
**
اذا اوصف مثلها اطب منيا باب
وكل باب الأطبه كبالي صورتها
**
ولو غانم الوالد واعز من الروح
ربع الحب اله والباقي حصتها
**
اهي اول نسيم الهب وسط ريتي
وبعد ماهب مثلها ومثل ريحتها
**
وهي اول طعم زاد النفذ لحشاي
وبنا عضمي ولحمي بفضل درتها
**
سهرانه بليالي الشتا عد راسي
انه مشرغد وهي منغصه بنومتها
**
سنين العمر نزفتهن على سنيني
ولا ساعه بعمرها الخذت راحتها
**
تلتذ بالأذيه وراهمه على الضيم
شكثر ماعذبتها تزيد لذتها
**
وذا كلنه عواطف والده هاي
بين الام وبنها الفطره غذتها
**
ترى حنان الام لبنها منهو ازغير
ونه امي ذيج هيه وذيج فطرتها
**
كلمة يلولد مابارحتها يوم
وكلمة بعد روحي مافاركت شفتها
**
شكثر وجعات من فكد الاحباب تسير
بس الام تجيس الكلب وجعتها
**
امي شكد وفتلي زغير وجبير
شما اكبر تطيب وتحلى عشرتها
**
ياخذني اللهو عن امي نوبات
وحنا امي عله حاله ونفس ذبتها
**
واروح فديوه الك اطعم ثلث كلمات
صرت جبير ومابدلت كلمتها
**
بعدها تشوفني ذاكه البعدني زغير
شما اكبر هذيج امي ومحنتها
**
يريت شبذلت امي وياي اجازيه
ورد فضل الأمومه بكد جلالتها
**
شجازي سهر ليلها لو حملها شهور
لو عصرات المنيه المني شافتها
**
لو سهر الليالي الكاضه الكاروك
بشتاها ولاغفت نص ربع ليلتها
**
تحط عيونها بدربي لون ماجيت
وتغدي الونه والدمعات سولتها
**
شحلات امي بسوالفها بنواعيها
بفرحها بحزنها وحتى صفنتها
**
وذا شدت الوزره بلمة الخطار
تشبع ضيوفها وتفيض سفرتها
**
حتى القافيه صارت على امي ولام
وتمام الوصف كول وفعل وصفتها
**
بكثر ماعاشريت وجربت ناس
وبخلت كلوبها وعرفت منبتها
**
عرفت اليحب واليكره وليش
وعرفت تحب عليش وشنهي غايتها
**
بس كلب الحنينه الوالده غير
احس كلشي التسويه من سجيتها
**
يربي المغفره منك الوالدتي
وتسير الكنزا بالمحشر شفيعتها
**
اريد الصبر منك وتكالي عليك
تجاوز عن ذنبها وامحي زلتها

[نور على الدرب]

امـــــــــــــــــي


يمه البيت عكبج يبجي عالبيت
وسود وداعتج شفت الحياطين
**
وعتبة بيتنه تبجي على الباب
وعلينه اتسودنت ماترضى ترحين
**
وشفت دمع البلابل والعصافير
طاح اعله المكان البي تكعدين
**
وشفت لطخة حزن بخدود الورود
وصبح بستانه يبجي البساتين
**
فراكج مو سهل يذبحني كل يوم
كل يوم بسنه لاوالله عشرين
**
ييمه بفركتج نص عمري ماخوذ
ولاجن فركتج يايمة يومين
**
ماادري شيضل لو طال الفراك
على هذا الوضع ينراد عمرين
**
شكض من الدمع ودموعي شلال
وعليج اتسودنت ماتسكت العين
**
جلمة يمه منج بلسم للجروح
وجلمة بعد بيتي اداوي جرحين
**

اذا موجودة يمه نصير عقال
ونصير بغيبتج مثل المجانين
**
على وجهج لكينه الحزن مرسوم
وكباله الفرح ذابحته السنين
**
تروح بروحتج ماتبقى ارواح
جسد واكف جذب بس احنا ميتين
**
يااجمل واحن مخلوق بالكون
مثلج ماكو اقسم مثلج اثنين
**
اغفه بحضن صبرج وانه شبعان
واحس جوعانه كلش من تنامين
**
امي الجنه انتي منزلة بيت
وتنام بظلج ابيوت الجوارين
**
سكوتج ادري يمة يحير الليل
مثل صفنه البحر لمن تصفنين
**
واذا تحجين بليل يعزف الحان
ومن حلكج يضل يطافر التين
**
خيط السبحة انتي اخذينه وياج
نطشر خرز لمن تروحين
*****

[الربيعاوي]

أ ريد ارجع على العشرة ** وانخاك
لان دم الوصل واحد ** وانا اخاك
ادري الوكت هذا هد حيلك** ونخاك
لكن تدري وكتي شسوة بيه
**
عجيبة تريد تنساني وانه** اسلاك
اظنك لاكي من غيري ** ونس لك
اريد اعرف شنوا اصلك ** ونسلك
وشنو انته يابوا اطباع الردية
**
يا صاحب لاتظن مسرور** بعداك
وعسى سم الزهر يندار** بعداك
شيطفي الكلب من نار** بعدك
يطفيها الوكت من ترد الية
**
القلب عاف البشر كلهة ** والك راد
مشى وسافر تذكركم ** والك راد
عرب ماطيبوا علتي ** ولاكراد
دواي انته يهل مبعد علية
**
شفته وجنه دورة بدر** وجهه
ونيران الغضه بحشاي ** وجهه
يربي يالتوجه الكون ** وجهه
على كلبي الذاب خله يحن عليه
**
ليش تخون وانت احلفت ** بآيات
ومزلاكة طلعت مو درج ** بايات
تريد تروح مو بس باي** بايات
واليرجع للوصل نعله على ابية
*****

[ابو عمار الربيعي]

واللة ندمه
________________________________________
كان شابا يحب فتاة وكانت الفتاة ترفض كل من يتقدم لخطبتها وكانت تنتظر الشاب بفارغ الصبر

فاكمل الشاب دراسته واصبح موظفا ولكن للاسف تزوج فتاة اخرى وتركها

فمرت الايام فالتقى الشاب بالفتاة فلم تقل الفتاة شيئا غير عبارة واحدة وهي (واللة ندمة)

فتأثر احد الشعراء بهذه العبارة وجسدها بقصيدة وقال بها:-


واللة ندمة إإ
*******

مات جوة الكاع حبك من عكب ماجان نجمة

وشرجي صار العمر بعدك يالجنت بأيامي نسمة

احنا سبحة وطش خرزهة مانرد هيهات لمة

دنيا جذابة ووكيحة وهالوكت ماعندة ذمة

واني حزني الجان جاهل من هجركم صار زلمة

واللة ندمة إإ

بية وصلت انسة اسمي ومانسيت بيوم اسمة

وروحي بيني وبينة صارت لاهي يمي ولاهي يمة

شما اريد الزمهة عنك روحي ماتنطيني لزمة

واللة ندمةإإ

حصدوا ابستان وردك وانه حصرة علية شمة

وكالوا المقسوم يحصل وانتظر تجمعنة قسمة

ولو سمعت جدام مرت كلبي فرفح كال جدمة

واللة ندمة إإ

حسبت يذكر محبتي وبالبواجي عيونة تعمة

بطلت عينك بواجي ورضت بشفافك البسمة

واللة ندمة إإ

شمعي نورتة بطريقك وانتة شمعاتك مظلمة

كلي يانوم الانامة وياحلم كلي الأحلمه

كافي وانساهم ياكلبي وذولي موش وجوه نعمه

تكتب بدمك رسايل للي مايسوون جلمة

بعد لاتحمدلك احد تالي هم تحتاج ذمة

[علي كاظم درجال]

محتاجه كلش الك يل شاغل انت الفكر
محتاجة الك مو حجي وارتاح من ينذكر
هنيالة من كابلك يااحله صورة شعر
محتاجة الك ماتجي ماباقي شي بالعمر
زعلان ؟ليش الزعل زعلان انه اعتذر
بس ارجع لخاطري صير على نحري عطر
صير على جفني كحل حليني بين السمر
تعبني ذرف الدمع بس ماطفالي الجمر
بركان في داخلي وياخوفي لاينفجر
شمأخرك ماتجي ماظل الك كل عذر
اهلال جرحك كمل اي كمل واصبح بدر
صدكني حيل اتعبت حبك عسر مو يسر
اترجيت وتوسلت بيك شكثر وشكثر
مافاد بيك الرجه وجبرتني لهل امر
مابعد اضلن شهد خليك مني حذر
واحجيهه لاتستحي كول انت طبعك غدر
حبك تحية صبح ماتلفض بالعصر
روح وبعد لاترد شي عادي صار الهجر
الماعرف معنى العشك مابعد احطله كدر
جانت درجتك الف بس هسه صارت صفر

[علي كاظم درجال]

فدوة تـــروحـلك هلناس
واولـهـــــــم اروح انــة
الجمال البـيـك شمسـوي
بحــــسـرت كلـب خلانـه
ربـك مــن عـسل سـواك
واحنـــة بطـــين سوانـة
عليك الناس كلهة اتبـاع
وانة عيــونـــي خجلانـة
جـــمـالك دوخ الحاسـود
سبحان الخلق سبحانـة
اتمنـــــة بتهـم محبـوس
مــــــــؤبــد بلسجن انـة
وانــــت القاضـي اتمنـة
وكلبـــــك هـوةزنـزانـة
تـعـذب بــيـة ميخــالـف
روحــــي والله فرحانـة
عشي هــوة كلبــك صـار
وبيـتـي تـاه عـنــــوانـة
احبك جــيـت الـك عنـاي
حياتـــي ليــــك ولهـانـة

[علي كاظم درجال]

روح براحتك لو عني ردت اتروح
علي لتخاف .. اعذرك ماتحاجيني
وياك اخذ عيني التهل ادموع
ومن تشتاكلي بس باوع العيني
كلب الحب رسمته بجف يسرتي وهاك
شوف اسمك كتبته بشوكي بيميني
بنص درب العشك شو تيهتني شبيك
تدليني كلت جا ما تدلّيني
اليذكروني عفتهم لجل شوكي وياك
واني اتذكّرك وانتي الي ناسيني
ضحّكتك لمن جار الزمان عليك
حرام عليك تتعمّد تبجيني
بايعني برخص واني بغلاة اشريك
مو انت الكلت بالروح تشريني
صرتلك كلّي شمعه ونوّرتلك دوم
عكب ما خلّصتلك نور عشريني
بعد ما كلت آه ودرت وجهك ليش
جي طرواك كتلك ضل يداويني
وجي كتلك ضواي ونور عيني اتصير
تريد اتروح عنّي اتريد تعميني
روح وداعت الله بس اكلك ها
الي رب ٍ كريم الصبر ينطيني
الي رب ٍ كريم الصبر ينطيني

[علي كاظم درجال]

كرهتك كثر ماودعت الشموع
شمعه بعيني تحله وتطفه شمعه
جنت كبر الجرح شايل معاناة
وصدك جان الكلب من ينعه ينعه
جن داخل حسن لو طلعت الاخ
وتطلع روحي الك وتردهه فدعه
حسبّتك رقم من لمعة البيك
وين ادري الصفر هم ينطي لمعه؟؟
وين ادري الغصن بيه يركض الموت
وعلى عش المحنه يودي الافعه
باجر راح اجفن كل الجروح
ونعش الذكريات براسي اشيعه
وباجر راح اهدّم بيت الدموع
وابني من الفرح بعيوني قلعه
وتذبل شفتك وترد الي زحوف
وانه بجفي النهر وبكيفي اكطعه
وأكلك كلشي مات اللهفه والشوك
محال اليندفن تكدرترجعه
وسود تصير كلهه ايامك البيض
وينذل خاطرك ويعض اصبعه
مثل ماجرعتني بكاسك الموت
كاس الذل شرط باجرتجرعه

[علي كاظم درجال]

حبك مات عدنه احنه ودفناه
و ثوب اسود لبسنه احنه و حزانه

نحزن مو عليك انت حرامات
ما نحزن على الباعو هوانه

نحزن على مضه من ايامنه الحلوات

وخلينه الفرح يركض ورانه

عفنه هوايه لأجلك (وانت ماحسيت)

و لأجل عينك تحملنه المهانه

وتالي بكل صلافه تخون الاحساس

وتطعنّه ب برود و من ورانه


جنت طير وترفرف فوك غيم الشوك

اطلع بره متريدك سمانه


شلت كتاب حبك من رفوف العين

يل كتابك طلع اسمه خيانه

واذا روحي تحن راح اكتل الروح

وبيدي وداعتك انه اكتل انه
وبيدي وداعتك انه اكتل انه

[علي كاظم درجال]

أنا وليل ألمجر وألون والهموم
انتشارك والدمع بعيوني شاهد
*****
مفتاح قصيده للشاعر علي كاظم الدرجال ( ابو عمار الربيعي )

[نور على الدرب]

لاحن
ملوم الكلب عالطيبين ** لاحن
غنج ومهندج ومهيوب ** لاحن
بصدر المجر والنخلات ** لاحن
تذكرت الجره والصار بيه
ماجراني
انه ألجريت حبلك ** ماجراني
وانه من جور دهري ** ماجراني
سألني ألأصل كتله ** مجراني
عرف مجراوي انه وخان بيه
بيدراوي
أنه الحاوي رطبكم ** بيدراوي
وانه ألمحد حجالي ** بيدراوي
ٍسألني ألأصل كتله ** أبيدراوي
ألمنزل كصب والعيشه هنيه
******
مع تحيات الشاعر علي كاظم درجال ( ابو عمار ألربيعي )

[ابو عمار الربيعي]

ملحها
عكبك دنيتي فكدت ** ملحها
وبعدك صرت ياصاحب ** ملحها
أمدن علعنب ايدي * * ملحها
كلت حامض يخي غصبن عليه
*******
من شعر السيد قاسم كريدي المالكي