(( زرازير البراري))
حن وأنا حن
و انحبس ونة ونمتحن
مرخوص بس كت الدمع
شرط الدمع حد الجفن
...
جفنك جنح فراشة غض
و احجاره جفني و ما غمض
يل التمشي بيه ويه النبض
روحي على روحك تنسحن
حن بويه حن
حن عمي حن ...
..
..
عيونك زرازير البراري
بكل فرحها بكل نشاط
جناحها بعالي السحر
و الروح مني عوسجة بر
ما وصل ليهه الندى
و لا جاسها بگطرة المطر
وصفولي عنك بالنباعي تفيض
و تعليت ليلة ويا القمر
وصفولي عنك كل مسامة تفيض منك عطر
يالحسنك نهر..
تنزل بصدري ويا النفس
و بدمي غصبن تنعجن
و أشهگ و اصعدك للسما
بحسرات و بعنة حزن
حن.. حن بوي حن
..
**********
شفافك ولا گولن ورد .....
عنابه معگودة عگد
تمتلي بگد ما تنمرد
لا هي دفو ولا هي برد
أنا بوصفها راح اجن
حن بوي حن
***************
سكتاتك تشكل خواطر بالگلب ...
مالي عرف بيهم كبل
مبروم برم الخياط يا ريان
و الخاصر خصر لف العگل
كل كلمة منك ...
نبعة البردين .. بالدلال ...
ما تحمل ثگل
وصفولي عنك
وردة من قداح ريش جناح
زاهي بالسحر
وصفولي عنك
شال منك غيظ بستان الورد
والنرجس الرايج سكر
حنو طواريز ولحن ...
و حنت حمامات السجن
حنه إلي ...
و حنه إلك ...
واللي يعجبه خلي يحن
حن بويه حن
*************
آنه من أشوفك
يمتلي الماضي الجدب
زهرات بيض من الوفه
وروحي سواجي من الحنين تصير
وأتنبه وكت بيها غفه
يا محجل إن مريت بيه ردود
أرد أردود بالعشرين ....
من عمر الجفه
وأنصف عمر منك
فما أنصفت إلا بالهجر ...
والهجر منك ما كفه
حتى الهجر يا روحي
منك ما كفه
وكلبي عله هجرك دوم يحن
حن ...
وآنه حن
وأنحبس ونه ...
ونمتحن
مجبور أرخصك على الدمع
شرط الدمع حد الجفن
رد مع اقتباس
