قصائد من الشعر الشعبي

[جاسم البغدادي]

　

مسافه ليل

ودمعه حلم

نداوة صبح ترويها

يا عين الكحل

مسرى الدمع
علخدين
مسحه حزن
ينطيها

وشلون تاليها ؟

....

مسافه ليل

ودنيا ظلمه

وعين التشوف الصبح
دمع الليل يضويها

مسافه ليل

تعبه الرجعه عنها
ويتعب اليمشيهه

مسافه ليل

والدنيا شته
بلايــّه ضوه
بس المطر
وسوالف قهر

وهموم

تتعارك ويه هموم
هاي اولهه
سهرانه ويه السهر

وذيج تاليهه

　يهل تحزن
يهل تسأل
وباب الفرح
متنكر لخطـّاره
وباب الحزن
بزفـّه تجيك اخباره

مسافه ليل

ووحشه درب

ما ينساك
بس ناسيهه
وعين الما تشوف الفرح
تالي الحزن

يعميهه

جاسم البغدادي 1997

[جاسم البغدادي]

بعدك تذكرني لو نسيت؟
ابشرك
آنه خلصت الكتابه
وسديت الدفاتر
وانتهيت
ابشرك
آنه ضمدت الجرح بالفرح
وتوسدت الحلم
وتغطيت
وبالحلم هم نسيت
ومن جديد , آنه حبيت
لكن ياحسافه من صحيت
ذكرتك
وكبل ما اذكر
بجيت
طلعت انته الي بالحلم
من جديد
اني حبيت

ك

[جاسم البغدادي]

بعدك تذكرني لو نسيت
وتذكر
من صبحيه اجيت
وبزجلة فرح
گلت: آنه حبيت

وسألتك
منو هذا سعيد الحظ ؟
حسبتك تكلي انت

بس ما حجيت
أصفنت انت
وبحبسة دمع
آنه بجيت
معذور..ماعندك ذنب
ولا جنيت
الذنب ذنبي
بيك آنه ثقيت

[جاسم البغدادي]

انت بأمرك اهتم
ولاتهتم بعد بامري
بس احلفك لو ردت تبجي
تمسح دمعك بصدري
هنا جنت تتوسد
وكل دمعه التصب منك
تآخذ عمر من عمري

[جاسم البغدادي]

على عيونك انكتب تحذير
ضغط عالي وخطر موت
اذا نظره من يوسف گطعت إيدين
تره عيونك حبيبي تهجم بيوت
خلولك حراسه بكل درب .. تدري؟
بس غض العين .. وبيا درب فوت

[جاسم البغدادي]

حبيبي اليوم سألوني عليك
ردت اجاوب
صاحت دموعي : لا الله عليك
مشتاقه انزل مره بفرح
كافي بس بالحزن
للدوم اواسيك
دموعي يتامى وتنتظر فرحه
صابره وتنتظر فد يوم الاگيك