كصدت احسين زاير واطلب مراد
وهو بكل عله يدري ويشفي الداي
على خدودي تسيل دموع العيون
ولاعندي وسيله وضاع مني الراي
ضاكت والعلل كثرن يمولاي
اجيتك خادمك يحسين شجاي
طلب عندي بسيط وجيتك اليوم
وادري الحاجه سهله بحضرتك هاي
ماعندي بضاعه بيوم الحساب
واريدك سيدي تسجلني مشاي
راعي الكلفه انته وكفو يحسين
وادري لدين جدك صرت تجاي
انطيت العمر خاطر يثبت الدين
لذلك فضلك ربك يوفاي
وفه العباس منك ماخذ ادروس
شلون اتريد كبلك يشرب الماي
لذلك سيدي بداعت العباس
تنطي مراد كلمن كاصد وجاي
وطوه النيه بصريرة وامل مضيوم
وعاف اهله وجهاله وجاك عناي

ابراهيم الخفاجي