أحنا بس نكدر عل الفقير ظ

[محمد الربيعى]

أحنا بس نكدر عل الفقير ؟

"جكارة من التتن لفي وألفلك وألف مليون من مثلي ومثلك "

الناس التي تطلع تظاهرة مثل المعلمين ما يعادلون عشر من عشر المجموع بالمقارنة مع العطالة بطالة
أو الناس التي هدمت دكانيهم وأكشاكهم في بغداد أغلبهم خريجين وما متعنين ناس فقره من كل المحافظات تريد تعيش عوائلها والله شنو جمالية بغداد ( بغداد بس لذوله الكفوش ) وهم ما يخالف ظاهرة حضارية لكن جد للناس فرص عمل وشغلهم مو تخليوهم دايحيين لو ينقلبون ( سلابة ) أنت بس تفكربنفسك يا عضو البرلمان أول ما تحط رجل بقبة البرلمان ( وأشلون برلمان عين الله عليه ) يصرفولك 130 مليون والله شنو حتى ما ينهب ويبوك الأخ وأشوية يترفه ....... !! بالله شراح يسوي يشَرّمْها !!! والتالي هذا الكفش يلط لما يكول بس

******
أنا من الناس واحد من ولدي ماجستير ومن الأوائل وما تعين وصار عمره الآن 34 سنة والآخر بكالوريوس وأيضا من الأوائل وما تعين .. وقبل عشرة أيام صعد ولد شباب بالكيا كال سمعت قرب الجامع الفلاني في حي التأميم دا يقدمون على وظائف خريج معهد قال عمو والله أنا خريج معهد وعطال بطال أروح أقدم على وظيفة عسى ولعل ( منظف بالبلدية ) هي هذه الفرصة !! قال ولله عمو أشتغل سائق (دمبر )
عمي وين أكو تعيينات بس للأحزاب نضحك على نفسنا ؟؟؟
يجوز ذولي الذين ذكرهم زميل لي أن فلان المعلم هو وزوجته كلاهما يأخذون راتب
أي صح هاي قبل قبل بالبداية بوكت الأميركي وبعدين صارت الوظائف تتوزع عل المحسوبية والمنسوبية وعلى ويلاد عم الأحزاب واخوتهم وخواتهم وأقربائهم ( من لعنة على أبوهم لا أبو خواتهم )

وأنا كلتها من كنت بالوظيفة :

"من يتمكنون ويترهون راح يرجعون بالسيكا للناس وراح يظلمون الناس " وكلمة حذفتها يمكن أزيد !!

أول الأيام بوقت الأمريكي شوية صارت تعيينات ووزعوا دولارات والناس فرحت لأنه أغلبها ما كان شايف الدولار والمعلمين بقرقوش كالوا "يا ريت خلصنا منه من زمان "
المهم ما طولت الشغلة وإلى حد وقت المالكي أنقطعت الفرص نهائيا وفعلا كما كنت أظن وأتوقع صاروا يحاربون الموظف ويمنعون عنه فرص حتى أكمال الدراسة ( على ناس وناس يجوز ) لكن أنا عشت الواقع واعرفها حباية حباية أدري زين شلون كانوا يحاربوني ( لكن إرادة الله أكبر منهم ) ...
قررت لما رحت أدرس مسائي وأكمل دراستي في ( جامعة حكومية ) أو جامعات حرة أو مراسلة جامعات عليا لأول مرة بالعمر كي أحصل على شهادة شوية أعلى وأطور نفسي .
هذه يستكثرونها على الموظف ( واحد يريد يطور نفسه يريد يتطور شوية لو يروح يبوك ما يمانعون )
موظف وخدم الدولة 40 سنة وشاف كل الضيم وجته فرصة لا ما يصير يريدونه حاشا قدري ( مطي )
بوقت صدام منو كان يفكر بأكمال الدراسة لو كنا دفاعين عرباين لو سواق تاكسيات لو تصير مهرب وتهرب بانزين للأكراد (لأنه بيش تعيل عائلتك وراتبك فلسين ونص )
وأنا من الناس ما أن تحسن الراتب أول شي فكرت بالدراسة لماذا لأنه لم تسنح لي الفرص مسبقا في إكمال دراستي وكنت أرغبها الدراسة وإلى الآن , ولو ما تعدل الراتب شوية شلون كان أفكر أدرس !
( مستحيل )

تلك الصفحة السوداء نمقتها ونعرف كيف أضرت بالناس والله ذات يوم وفي مجلس فاتحة ( بعد السقوط ) صار حديث وكلام عن المعرفة وتدوال المعرفة وكان ناس كبار شخصيات حاضرين , وعلى غفلة ذبيت حسرة :
لأنه أبسط شيء هذا النت كنا محرومين منه وألف كتاب وكتاب ما كنت أحظى به أو أن اقرأ حرف منه ذات يوم.

بالنسبة لي أنا كنت أفكر بالعلم لكن لولا (المال ) لما كنت أحصل على العلم والحمد لله من شهادة معهد قبل السقوط صارت ماجستير بعد السقوط هذا بالنسبة لي يجوز غيري ما نفس الحالة , وفي كل حال الموظف همه الراتب فهل يعقل أن معلما ... ( لا أدري ومن قناة الشرقية نقل حي من البصرة ) كانت تظاهرات لكن سمعت واحد منهم يقول " هل يصير معلم يشتغل بورشة غسل السيارات أو محطة بازين ويأتي طالب يقول له أغسل سيارتي أو فول سيارتي " يجوز هذا المعلم ما متعين ورايح يشتغل المسكين بورشة غسل سيارات ؟؟ ألف مثله أكو

ولنختصرها بحرف :: (التعيينات بس للأحزاب ) !!!
وطلع كلامي صحيح ما أن تمكنوا حتى شكول " ينيجون الناس " من ألف .... بعراضهم كلهم سيبندية

وهذه السالفة فقط قبل يومين سمعت بيها ( زارت قناة سما الموصل قرية تدعى تيس خراب ورجل شيخ تكلم بصدق الضمير وقال :
أول ما واحد يصير ( برلماني ) وقبل ما يجلس على كرسي البرلمان تدري أشكد يعطوه :
130 مليون يكولون حتى يرفه نفسه وما يمد يده للحرام لكن التالي بعد شهر تصير عنده شركات وعلاوي ويشتغل البوق و ( بأسم الشعب ) بلي هذه العبارة أهتم بيها شوية ( بأسم الشعب )
أحنا بس نكدر على معلم مسكين فقير : وايضا أتفق مع الرأي العام العمل الذي ينصح :
أن العمل له حرمة وينبغي احترام ساعات العمل لكن إذا كان :
( رب البيت في الدف ناقرا ؟؟؟ ) ماذا سيكون ؟؟ وأفهمها بالله هذه شوية أيضا رحمة لوالديك
الخياس يبدأ من الأعلى وينساب نحو الأسفل !! من فوك الشغلة خايسة لا ترجع عل البطانة

أول أمس مهدمين وبالشفلات منطقة ببغداد : يكولون حضارة وحفاظ على جمالية العاصمة ..... صحيح

لكن من كل المحافظات من الديوانية ومن السماوة ومن كربلا كلهم ناس مساكين وبسطاء ومفتحين لو أكشاك لو دكاكين بسيطة ومنهم من يقول (صارلي أربعين سنة بهذا المكان ) يعني من وكت صدام ويكولون باعوها لنا بيع المهم يجوز يكذبون لكن لما تطرد الناس او تهدم دكاكين الناس جد لهم فرصة بديلة أولا ... وبيهم المساكين العشرات من خريجي الكليات والمعاهد و (معلمين ) وما متعينين !!!

وأخيرا :
جكارة من التتن لفي وألفلك وألف مليون من مثلي ومثلك

[تيل كهرباء]

المعلم والطبال
اكو معلم زمن صدام يدك خشابة بالاعراس ( طبال) بس خوش طبال نوبات من يزيد الطرب يعوف الطبلة ودكص ركص عبالك رقاصة ملهى ... شافو الشباب قبل يومين ابنص الاضراب متظاهر ويصيح ( بسم الدين باكونه الحرامية ) هسة هو صدك يريد يحارب الفساد لو ضايج من الاسلاميين لان كطعو خبزتة من جان يدك خشابة ( زينين احنه وداعتك) لان قبل يدك طبل والعشا خبازي هسة سيارة 4 ويل ويدرس بصف بيتهم ولابس بنطرون وقندرته تلمع وين جان دشداشة وجشماغ احمر ونعال ابو الاصبع وابنص الكواولة ..... والمعنى بقلب تيل

[محمد الربيعى]

أخ تيل أولا ماذا يقول المثل : الشبعان ما يدري بحال الجوعان صحيح أنا علقت على موضوعك ومنطقتك أنت أدرى بيها لكن أنا بشكل عام وردت أتوسع أشوي وأذكر ما يتعرض له الأطباء كحادثة كركوك الأعتداء على الطبيب المناوب بسبب إمرأة طاعنة في السن عمرها فوق السبعين يعني ( شنو ما تموت ) وصارت ظاهرة معتادة كما نسمع في كل المحافظات السبب الأول عدا قلة الأخلاق لكن الأهم عدم إنضباط الأمن وهيته على قولة المثل لا أكو حساب ولا أكو عقاب وصارت مسألة يكول أنا منتسب كل واحد يكولها تروح لسرى حصة النفط حتى تحصلها من محطة التعبئة عشر تيام توكف وما تحصلها يا هو الجا وكال أنا منتسب وبلا سرى طبعا بالمستشفى أيضا كذلك لأنه صارت وياي دا أتكلم مع الطبيب على مود فحص سونار لأمي عمرها فوق التسعين رأسا تدخل شخص لابس مدني قال أنا حشد طيب أخي طالما أنت ( حشد ساعدني الطبيب ما يقبل يكتب لها فحص وأرسلتنا الطبية أم حالة الطواريء له ) المهم زين طلع خوش رجال يعني بصراحة بمناطقنا صارت هيته منتسب أو ما منتسب ما ندري الكل تكول ( منتسب ) شرطي عسكري غيره نفس اللفظ .... (ذكرتها لأنه من ضرب ذلك الطبيب مناف في كركوك كانوا منتسبين ) أقرباء أو أبناء المرأة التي توفيت ومزركين عينه وكاسرين قدمه ...... ) وبالمستشفى فشلون فوضى !!!

المهم نرجع لموضوعنا بخصوص التظاهرات
أولا لو ما أكو شريحة مظلومة أوتشعر بالغبن أينما كان في الصحة في التعليم مستحيل تطلع تظاهرة وبدون سبب يعني بالعام الماضي بالبصرة لو الكهرباء معتدلة كان طلعت الناس ؟
الجواب أكيد ( لا )
أما مسألة تصرفات مثل الذي ذكرته كاولي ما أدري طبال يجوز أكو ناس مغرضة بكل وقت فما نحكم عل الناس من خلال شخص

[محمد الربيعى]

والمعنى بقلب تيل

أخوي العزيز تيل أنا هم شفت وإذا ما شفت سمعت ناس بوقت صدام كانت تهلل وتصفق للقائد الضروطة وتسويله حفلات ميلاد لكن بعد 2003 اشو نسوا وعلى غفلة تنكروا ولا كن لذاك التاريخ وصاروا أحزاب غير شكل ترى الفيدوات كثيرة وكلام الثرد كثير لكن رحم الله أمريء كف الغيبة عن نفسه أنا أيضا أكول المعنى بقلب كاتب السطور وترى ما عندي شي مضموم أضمه لأنه الهوسه أعلاه ( باسم الدين باكونا الحرامية ) ما تخصني لأنه اصلها ومصدرها من يمكم , فأخوي لا توهم أرجوك لأنه كلمتك ( والمعنى بقلب تيل ) خلتني أفكر شوي هذا الرجال اللي مصخته من يمكم من ديرتكم ما من الغربية ولا الشمالية فأخوي على كيفك شوي :

الماي شكد شريف وبي حياة الكون ويدور الناصية وما دور التلة