غفوة
جماعة ايام الخير تفيدكم

اوقف سيارته البرادو خلف سيارة زوجته الكيا في كراج البيت ودخل البيت من باب المطبخ ، لم يشم اي رائحة طبخ فأبتسم وقال مع نفسه .. كالمعتاد سأجدها ماسكة الآيباد او تتكلم مع صديقتها عن سفرتها الأخيرة لتركيا ، وبالفعل وجدها كما توقعها ، ما ان رأت زوجها اعتذرت من صديقتها واستقبلت زوجها وقالت ..
- دقائق وسيكون الغداء قد وصل .. طلبت لك اليوم من (تجهيزات الزعفران) محشى الدجاج بالتوابل الهندية .. ادري بيك تحبه .. خوما يومية نطلب لحم غنم موزين عليك
- شكراً حبيبتي الله لا يحرمني منك
بعد الانتهاء من الأكل وشرب الشاي مسك ريموت التلفزيون ، اثارته الاخبار المصورة من احدى القنوات الفضائية فأنتقل الى قناة أخرى وشاهد نقاشات مجلس النواب .. أخذ بلعن السياسة والسياسيين الفاسدين ولعن امريكا التي اطاحت بصدام وشاركته زوجته بالكلام قائلة ..
راحت ايامك ابو عداي وراحت ايام الخير وياك .. خليتنه نشوف هاي النمونات ..
بعد نصف ساعة استأذنت من زوجها لأن صديقتها ستمر عليها بسيارتها الجديدة ويذهبن للجم ومن هناك الى مول بغداد .. شوية نفرفر بالمول ههه ونشوف اذا اكو شغلات حلوة نشتريها ..
- اوكي حبيبتي بس لا تنسين اليوم علينه السرة نعزم الجماعة بمطعم الاقحوان .. آني راح اتمدد هنا واشوف فيلم عربي احسن من لغوة هذولي الفاسدين ..
- لا شلون انسه .. باي
..

بالدقائق الاولى من الفيلم اخذته الغفوة واطبقت عينيه شيئاً فشيئاً ليرى بمنامه ..
قاسم السلطان يهتز بكرشه ويغني ..
هلا بالراجع لينا
ومضوي ليالينا

هلا بأبن هدله
وبيه ايامنه تحله

بعدها يطلُّ على الشاشة المذيع مقداد مراد وبصوت هادر وعيون تجدح شرراً ليلقي بياناً هاماً صادر عن مجلس قيادة الثورة يعلن فيه ..
* القاء القبض على كل اعضاء مجلس النواب ..
- يا الله خوش خبر ..
بينما يواصل المذيع اذاعة البيان يقوم هو بالتعليق على كل فقرة فيه..
* قطع العلاقات الدبلوماسية مع ايران والسعودية وتركيا وسوريا والكويت ..
- اي هاي الأخبار الحلوة .. خلي نخلص من شرهم
* اعادة العمل بكل قوانين مجلس قيادة الثورة
- اي عفية.. خلي يشوفون العين الحمرة هذوله الفاسدين
* خدمة للمواطن الكريم تفعيل العمل بالحصة التموينية
- خوش خطوة ولو ما احتاجها .. لكن خطية الناس بس لا يرجعلهم الطحين الازرك ابو الحصو والدهن اليبقه بالزردوم
* غلق الحدود ومنع السفر خارج العراق
- آخ آخ هاي شلون ما اتفقنه هيج .. عندي سفرة الاسبوع الجاي لأذربيحان وجورجيا !
* قطع الانترنيت وغلق الفضائيات كافة
- لا لا شنو السالفة مو هالثخن .. موبايلاتنا شنسوي بيها .. وشلون أخابر صاحبتي وشلون ارتب اموري واسوي كعدات الكذا
* اعتقال كل الموظفين الذين اغتنوا بعد عام ٢٠٠٣
- هاي شنو ؟ يمعود تريدنه نرجع على راتب العشرتالاف ؟ شنصرف شناكل ؟ يعني ارجع للغرفة مالة اهلي
* سحب العملة العراقية الحالية واعادة التداول بالعملة الورقية التي تم طبعها في مطابع مصرف الرافدين والتي تزينها صورة الرئيس القائد حفظه الله ورعاه
- اويلي هاي وين جانت النه .. احنه ما صدكنه نخلص من الورق المطبوع
* عدم التعامل بالدولار وأي عملة اجنبية وسيحاسب بشدة وتصل عقوبته الى الاعدام كل من يحملها او يعمل بها
- آخ يابه راحت فلوسك يصابر ..
لعد شلون وين راح تروح الشدّات مالتي ومالة غيري ؟
* اغلاق المولات في عموم العراق وجعلها مقرات لفروع وشعب الحزب القائد
واعادة العمل بالجمعيات التعاونية
- اويلي .. مرتي هناك بالمول
فزَّ مذعوراً واستعاذ من الشيطان الرجيم ومن ايام الخير التي حلم فيها .