برنامج فتاوى على الهواء عام 2200

[أبوهاشم]

[align=center]برنامج فتاوى على الهواء
عام 2200[/align]
[align=center]المذيعة (غير واضح بالضبط ما إذا كان مذيعاً أم مذيعة ، ولكن الراجح أنها مذيعة) : نبدأ الأسئلة ، ومعانا الشيخ تامر الساهل علشان يرد على أسئلتكم .
الشيخ إلى جوارها يرتدي بنطلون أبيض ضيق ، وتي شيرت ، وأنسيال .

السؤال الأول بيقول (تقرأ من ورقة في يدها) : أنا بسبب الانشغال باضطر أصلي الظهر ركعتين بس ، فمش عارف إيه الوضع بالنسبة لي .
الشيخ تامر : يا جماعة قلنا قبل كده إن صلاة الظهر ثلاثة ركعات ، وإن أدائها كاملة ضروري إلا في حالات الضرورة ، وحالات الضرورة هي على سبيل الحصر : ماتش كورة على الهواء ، يعني مش ماتش مسجل ، بلاش التلاكيك ، وفيه بعض العلماء قالوا إنه لازم يكون ماتش نهائي دوري أو كأس ، لكن إحنا تسهيلاً على الناس ح نقول كفاية يكون ماتش على الهواء مباشرة ، وعندك كمان المسلسل العربي ، وحالة أن الواحد يكون زهقان أو منيق أو مزاجه مش قد كده . دي حالات الضرورة اللي حددها الفقهاء الخمسمائة .

المذيعة : السؤال اللي بعده بيقول : حضرتك قلت إن اللي يرتكب جريمة الزواج المكرر ، يعني اللي يتجوز على مراته ، يخرج من الملة ، ويكون كافر ، حسب المرسوم الأمريكي رقم 1356 لسنة 2050 ، مش شايف حضرتك إن الرأي ده فيه تساهل ، على أساس إن فيه بعض الشيوخ قالوا إنه يجب إهدار دم هذا الشخص؟
الشيخ تامر : يا جماعة حكاية القتل دي حكاية مش سهلة ، وأنا أختلف مع من قال بهذا ، وأتمسك بأن الشخص ده كافر بس ، ويجب علينا ننصحه .

المذيعة : السؤال اللي بعده ، مشاهدة بتسأل عن الشمبانيا وهل ينفع تشربها بكثرة؟

الشيخ تامر الساهل (وهو يضحك من قلة علم السائلة) : الشمبانيا العلماء قالوا إن حكمها (ماشي حالها) ، أما الكونياك فهو اللي حكمه (مش ظريف) لرداءة نوعيته ، والويسكي فهو مختلف فيه ، وأحب أنوه إني شايف إن الأسئلة كلها بتسأل في حاجات ثانوية ، زي الصلاة والخمر وكلام من ده ، يا جماعة خلونا نركز في المسائل المهمة .

المذيعة : السؤال اللي بعده : حضرتك قلت (أحب أنوه) يعني إيه أنوه .

الشيخ تامر : آدي الأسئلة الجميلة ، أنوه دي من الألفاظ العربية القديمة اللي كانت بتستخدم في أوقات قديمة ومعناها أوضح أو أبين .

المذيعة : السؤال اللي بعده : مشاهدة بتسأل : أنا بأصلي بالبادي والسترتش زي ما حضرتك أمرت في الحلقة اللي فاتت ، لكن بأحس إنهم بيتقلوا حركتي وبيضايقوني ، فهل ممكن أخفف؟

الشيخ تامر : يا بنتي أنا مش عايز أظهر متشدد ، أو متزمت ، لكن كل اللي أقدر أقوله إن الدين يسر ، يعني لو خففتي ما فيهاش حاجة ، أنا كنت بس بأقول للي عايزة تجتهد ممكن تزود وتلبس البادي والسترتش .

المذيعة : السؤال اللي بعده : بناءً على الفتوى اللي حضرتك أصدرتها في موضوع الحج ، أنا حاولت أحج لكن المشكلة إن قطر بتبقى زحمة قوي في وقت الحج لأن الحجاج بيبقوا كتير أعمل إيه .

الشيخ تامر : يا جماعة قلنا قبل كده ، إن ما يشترطش التقيد بموعد معين في الحج ، يعني الناس بتصر على إنها تحج في موعد الحج فقط اللي هو رمضان ليه مش عارف ، طب ما تحج يا سيدي في العيد الصغير ، أو في الكريسماس ، هو يعني تلاكيك وتشدد والسلام ، أهو ده اللي بيسموه التنطع في الدين ، وكمان مش شرط يا أختي تحجي لقطر ، الفقهاء الخمسمائة قالوا الحج ينفع لأي بلد تشترك مع قطر في جزء من الليل أو النهار ، أو أي بلد متوفر فيها خدمة الإنترنت علشان رمي الجمرات ممكن يتم بالماسنجر .

المذيعة : مشاهدة بتسأل : أنا وصاحبي فيه بيننا مشاكل بسبب إني حملت وما عرفتهوش ، وهو زعلان ، أعمل إيه؟

الشيخ تامر : يا بنتي إزاي تخدعيه وتكدبي عليه ، أهو كده ممكن ما يتجوزكيش ، حاولي توسطي حد في الموضوع ، وحاولي تقنعيه إن ده في مصلحتكم علشان تجربوا بعض في عملية التربية والالتزام بمسؤولية الأولاد ، يمكن ربنا يهديه .

المذيعة : عندنا سؤال من مشاهد من فلسطين بيقول : إمبارح فكرت بيني وبين نفسي إن بلادي محتلة وإن يجب علينا استردادها من المحتلين ، ومن ساعتها وأنا حاسس بالذنب لأني عارف إن الفقهاء الخمسمائة حرموا رفع السلاح في وجه أشقائنا اليهود ، أعمل إيه .

الشيخ تامر وقد أغمض عينيه من شدة التأثر : أستغفر الله العظيم ، مشكلتنا هي الجهل بالدين ، يا إبني حاول تستغفر وتتوب ، وقلنا قبل كده ، إن التفكير في المسائل دي حرام ، وإن النفس أمارة بالسوء ، وقلنا كمان إن من قبيل إظهار سماحة الإسلام إن الواحد مننا في فلسطين المحتلة أو مصر أو أي بلد مسلم يتنازل عن بيته لأخيه الصهيوني ، ويا حبذا لو تقاسم معاه مرتبه الشهري ، الإسلام لم يعلمنا الأنانية والاستئثار بالخير لأنفسنا فقط ، ربنا يا ابني يتوب عليك وعلى كل عاصي ، وأحب أذكر إخواننا بآيات السماحة في القرآن الكريم ، وبنص المرسوم الأمريكي المقدس الصادر عام 2130 اللي بيشرح هذه الأمور باستفاضة .[/align]
_:-

[عشاق ام البنين]

لا حول ولا قوة الا بالله العلي العظيم ...
الله يخلق البشر والاسلام يبتلي بها !!!
مهذا الكلام الذي كتبته هل مسلم ام لا اخي العزيز انت اذا كنت مسلم ويتهاء لك بانك تنصف الاسلام هذا المقالة فانت ومع احترامي لك خطء واما اذا كنت غير مسلم فهذا تجاوز على بقية الاديان ولا اتصور يوجد اي دين ام لة ترضى بالاعتداء على الغير !!
فمهذا الهراء التي تتحدث عنه مذيعة- اسلام -الشيخ -تامر - قرأن - مرسوم امريكي ووووهذه التفاهات التي هي وبصراحة تعبر عن نفسك ولاتعبر عن قرأن ولا الاسلام ..
فاتقي الله فيما كتبت والاسلام والقرأن اكبر منك انت الذي تتحدث بهذا الاسلوب
تحياتي للجميع