آنه أدري و غيري يدري
نشرنا قبل أيام قصيدة المغفور له الشيخ الجليل محمد الجواد الجزائري التي كانت رداً على قصيدة " الطلاسم " لشاعر المهجر الكبير إيليا أبو ماضي حيث أثارت هذه القصيدة ضجة كبرى و ردود و انفعالات في عالمنا العربي و الإسلامي .
http://www.iraqcenter.net/vb/showthread.php?t=17831
قام الشاعر الشعبي العراقي و الكوميدي المشهور حسين قسام ( جسام ) النجفي بالرد على الطلاسم و نظم قصيدة بمقطعين و أسماها : معارضة الطلاسم .
[poem=font="Arial,6,darkred,bold,normal" bkcolor="transparent" bkimage="backgrounds/18.gif" border="none,4,gray" type=0 line=0 align=center use=ex num="0,black"]
أصنت او إسمع كلامي انـچـانك انته متدري
آنه أدري و غيري يدري
* * *
بين ما أمشي بطريقي شفت شوف اعلى الجبال
عيون بيها بقدرة الله مايها مثل الزلال
عشب بيها و شجر بيها و سارحة بيها الجمال
فوگها وادم هوايه من كثرها تبيع تشري
آنه أدري و غيري يدري
* * *
بقدرة الله گمت أمشي بالدرب لمن مشيت
شفت بعيوني سواده چبيره وسرعت ليها او إجيت
لنها جاموسة چبیره انچـان انته ما دريت
واگفه ترضع إبنها و من ثديها اللبن يجري
آنه أدري و غيري يدري
* * *
وبطريقي جبل عالي بقدرة الله مو گصير
من لمسته صخر مرمر يلمع و ماله نضير
زارعين بوسطه حنطة و العقل منّـه يحير
لو أشـك آنه بصنعته بالقیامة شنهو عذري
آنه أدري و غيري يدري
* * *
بقدرة الله الزرع هذا من الصخر يربه و يصير
سْـألت واحد على الحنطة گالي عدنه چـثـيـر
گال زارعها بديتي وطاشها حنطة وشعير
مْجلخه رجلي وايديّه وبشغلها خلص صبري
آنه أدري و غيري يدري
* * *
للبحر لمّن سألته آنه گتله أرْدَ أگلّك
ما تگلّي امنين إنته و منهو گـُـلّي امصوّرك
امنين هذا السمچ یلعب یرگص ايغنّي عْلى ظهرك
الصوّرك صوّرني گـَلّي ومن قدرته تاه فكري
آنه أدري و غيري يدري
* * *
يا بحر انته ابمچانك إلك آلاف السنین
ومنك الأنهار تجری رایجه مـتـگلـّي وين
و السمـچ أشكال عندك تدري بيمن تستعين
نَبْ علَـَـْيه الحوت گَـَـلـّه بينه بُـنّي و بينه حمري
آنه أدري و غيري يدري
* * *
يا بحر هَـمْ انته مثلي و بحياتك هَـمْ أسير
ما تـگـلـّي شكثر غُـمْـگـك گـال لي بغمـگي تحير
أكو ابّـطْـني حجر غالي و أكو حواوين التطير
انته مُـتْـقدّرْ وجودي يعرف الغوّاص قدري
آنه أدري و غيري يدري
* * *
للنخل آنه سألته وسألت حتى الشجر
الخالية هًـم اسألتها والذي بيها ثمر
شايله منها فواكه و النخل شايل تمر
گـلّي هل قـُـدره اشكبرها وعاين الألوان تمري
آنه أدري و غيري يدري
* * *
الشمس و الفي صُـنـعـتـه غيره مو شغله محال
لو ردت تتمشّـه بيها ايصير لك منها خيال
انظر بعينك للأسود و زين عاين للجمال
هذا منهو اللي امصوره و الفلك خلاه يسري
آنه أدري و غيري يدري
* * *
و الـگمر لـمّـن تشوفه بالسمه يتيه الأفكار
عله الدنيه كلها يضوي لو طلع يسطع أنوار
ما تـگـلـّي الليل وينه لو إجه لينه النهار
يرحن ايردّن بْـأمْرَه و آنه اتنطّـر الأمري
آنه أدري و غيري يدري
* * *
والسمه شكبره ابقدرته مركبه بـلـَيّـه عمود
و النجوم اللي بسطها أبد ما تنـگص تزود
بَـعضه محطوط ابمـچـانه وقسم من عنده يعود
جـلـّت الباري قدرته أمري بيده و بيده عمري
آنه أدري و غيري يدري
* * *
منين هذا الغيم ينزل من ينزله و من يصعده
لو يذِبْ المطر مِـنّـه انته تگـدر له ترده
هذا بيد الباری کله واجب علینه نعبده
و الرعيد اليرن صوته بأمر الله السوه شبري
آنه أدري و غيري يدري
* * *
سْـألت من المطر گـَـلـّي منين هذا اماي جِـبْـتَه
يا بحر انطاك رُخصه و يا نهر مـنّـه حملته
من بحر قدرة الباري گــلـّي هذا الماي شلته
كل ثمر من عندي يشرب ماي فوگ الأرض يسري
آنه أدري و غيري يدري
* * *
و العجوز مِن اسألتها شلون من چـنـتی ابنيّـه
وين راح الحسن عَـنّـچ هسه عمرچ صار مـِيّـه
جاوبتني بقدرة الله بالك تْـقَـلـّـدْ عَـلـيّـه
عشت أنه من قچرته وانـْحَنه من الکـُبر ظهري
آنه أدري و غيري يدري
* * *
تدري بالنملة شكبرها شوف خلقتها و حلگها
گلب بیها او راس بیها وآنه أدري بالخلگها
شلون من تمشی رتطارد تسعى و تدوّر رزگها
بلا رجل أنظر الحيّـة اتگول ممشايَه على صدري
آنه أدري و غيري يدري
* * *
انظر الخفاش لمّن يجبل عليه الظلام
يطلع الرزگه يدوّر طول ليله ما ينام
يحمل افروخَه عله صدره وعله هذا الحال دام
هذا تدري من يعَلـْمَه يْعـَلـّمَه الیفنی و یبري
آنه أدري و غيري يدري
* * *
حدر أباطه امخلـّي مايه عاين القدرة الباري
يشرب ايغـذّي افروخه منين هذا الماي جاري
بليلة الظلمه طَـلِـعْـته الصبح ما تـلـگه طاري
و الفجر يدخل ابعشـّه يـگـول هذا محل وكري
آنه أدري و غيري يدري
* * *
وياك أرد احچـی دگلـّي منين يلفينه الريح
والبریج انشوفه یلمظ هذا هَـم گـلي يطيح
عليك ما أچـذب تراني هلحـچـي كلّـه صحيح
شوف هذا الكون كلّه صانعه الصوّر الفجري
آنه أدري و غيري يدري
* * *
آنه كوّني الباري من وجوده هل وجود
عايش آنه من رحمته وكل وكت بيّه يجود
آنه لو أنكر نعمته منكر ايطـگني بْعمود
هناك تتكلم إديّه و يشهد اعلیّه إظفري
آنه أدري و غيري يدري
* * *
چنت جاهل صرت شايب مرّت عليّه السنين
آنه كل عمري گضیته بْأمر رب العالمین
الحياة و موت بيده و باللحد أمسي دفين
يحيي و يميت ابقدرته و آنه مو ناكر الگبري
آنه أدري و غيري يدري
* * *
عاين وانظر خلقتك غير الله من صنعها
شوف أصابيعك وذانك غير ربك من جمعها
عاين النصبت اعيونك لو بچت ايهل دمعها
ما تدليني اعله دربه منين هذا الدمع يجري
آنه أدري و غيري يدري
* * *
من بطن أمك گلتله لمن منها تريد تطلع
لابس اهدوم عله جلدك يو تگع عاري مفرّع
من يغذيك ابلبنها لو ردت من عدها ترضع
اليغذيني الخلـگني من طفوليتي لكبري
آنه أدري و غيري يدري
* * *
آنه گمت أمشي بسرعه معتنى آنه ارد أزور
التفتت يمنه عله يسره لمّن طبّيت الگبور
گلت وین أهل الكراسي و الملك و اهل الـگصور
لا فقير اليظل بيها ولا يظل منهم المثري
آنه أدري و غيري يدري
* * *
الطفل مدفون بيها و بيها مدفون الشباب
من يعمر ألف عمره لابد ايضمه التراب
منكر بـگبره يظفره ايريد من عنده حساب
هذا من الباري حكمه والعمل الـگاه بگبري
آنه أدري و غيري يدري
* * *
سألت من الموته گولوا لو انتو اسا عظام
كلكم اعله الغبره نومه بلا نفس صرتوا رمام
جاوبتني الموته كلها عليه بثوا فد كلام
الدنيه للمخلوگ عبره وكل شخص من عدنه عبري
آنه أدري و غيري يدري
* * *
نزّلوني لعد گبري لمن أهلي ودعوني
ذبوا اتراب العليّـه ربعي گاموا یدفنوني
لمن راحت ربعی منی ثنین مدری منین اجوني
شلون خلقتهم مهوله بذوله گلت اشلون بصري
آنه أدري و غيري يدري
* * *
گتله یلمیت دگلي تفز يو نومك طويل
برغد ما تبـگه عله عیشك يلچنت مالك مثیل
گلّـي آنه موش بيدي و الأمر بيد الجليل
عگب لبسی و الترافه نمت عل تربان جبري
آنه أدري و غيري يدري
* * *
بالله یلمیت احچیلی هم إلك گومه و تعود
يو تظل بالـگبر نایم دوم معدوم الوجود
گالي يحييني ربّي وعل الأرض أمشي اردود
يوگفونی بطرگ وزره بالحساب بیوم حشري
آنه أدري و غيري يدري
* * *
بعد سولفلي يميت بالذي عدكم الصار
آنه أدري الموت هذا أبد ما منّـه فرار
گالي تعجز بوصفه بالـگبر ضگت المرار
والاهوال اللي شفتها من سبب فعلي و كفري
آنه أدري و غيري يدري
* * *
ثنين گالولی من اجوني علی اچتافك احنه چنه
گضت من الدنیه مدتك من عله امتونك نزلنه
كل ذنب عند نعدّه ما نخلي شويّه منّه
گتله اکتب حسناتي لا تضيع عليّه أجري
آنه أدري و غيري يدري
* * *
گالي ذنوبك نعدها چم شخص انته ظلمته
شعملت بالدنيه اكتب بالجريته و الحرمته
چم فقیر البگت منه وغصبت حگه و أکلته
منيلي گرطاس گتله بیش أملي و وين حبري
آنه أدري و غيري يدري
* * *
گلی من الچفن وصله اخذ واكتب بيها جرمك
واخذ من ريگك مدادك والقلم گلي اصبعك
الزينه و الشينه نـگلك اكتب و بيهن نعلمك
لا چبیره ولا زغیره وآنه بيدي اكتبت وزري
آنه أدري و غيري يدري
* * *
آنه گمت اكتب هوايه وهوّه لذنوبي يعدهن
ذنوب العليّه شكثرها گمت أصيّح من كثرهن
لمن بيهن طوگوني شرد أوصفلك ثـگلهن
چنهن اجبال عله جسمي سطروهن فوگ ظهري
آنه أدري و غيري يدري
* * *
بعد احچيلك مصيبه شهودي طلعوا مني بيّه
رجلي و لساني و عيني شهدن ابـگبري عليّه
والأصابع كلها شهدت و شهدت الأزيد ايديه
وين انطي الوجه منهم وشاهد اعليّـه خنصري
آنه أدري و غيري يدري
* * *
من لفاني الملك منكر هوّه وارفيجه نكير
على الغبره چنت موش نايم علسرير
وجوههم تخرع و وحشه عيونهم لمّن تدير
شلون اخلص و العذاب عليّه و النيران حدري
آنه أدري و غيري يدري
* * *
شلون حالی صرت آنه بگبري لمن گعدوني
ثنينهم داروا عليّه لمّن گاموا یسآلوني
علمعاصي اللي اعملتها يهل التنشد حاسبوني
امنين ما روحن اثاري حاطين اعليّه سرّي
آنه أدري و غيري يدري
* * *
گالی منکر یمیت ما تگلی منهو ربك
عمد من احدید بیده گلی یل گاعد ابگبرك
چنت بالدنیه اشتعمل یلعفت ملكيك و ولدك
چنت تعمل عمل طیب لو چنت بالدنیه دهري
آنه أدري و غيري يدري
* * *
كل جريمه طلعوها لمن بيهن علموني
حطوا الطوگ برگبتي وبالدنابيس اضربوني
لاچن الضربه عظيمه صار مدّه يعذبوني
عذاب منكر ماكو مثله وانهتك بالـگبر ستري
آنه أدري و غيري يدري
* * *
من العذاب الآنه شفته گمت آصیح الله وکبر
بگبري مستعقد یجیني حيدر الكرار يحضر
آنه يتلجلج لساني وهوّه يحچي ويه منكر
بين ما آنه بعذابي نور يصطع شفت گبري
آنه أدري و غيري يدري
* * *
وحاضر الشدات لنّه كرسي من نور انتصبله
وگف من دوني محامي وگام تلقیني یعدله
ابهیده یا منکر یگله استوه هذا مفارج أهله
شوف مکتوب بجبینه حیدر الکرار ذخري
آنه أدري و غيري يدري
* * *
د . عدنان جواد الطعمة[/poem]
رد مع اقتباس
