قصيدة للوطن .... نريد رايكم
[align=justify]
هذه قصيدة لاحد شعراء العراق :
مثل حيدر طبرتك يا وطن عالراس..........ومثل عباس عينك من طفو عينه
ومثل حسين الا من ناصر أنته تصيح..........بس ماكو أخو ينطيك جفينه
ولا عندك مثل زينب أخت تنعاك..........وراسك عالرمح تنطگ شرايينه
ولا صاحب مثل عابس الك يفزع ..........يشگ الگاع لو هاجت سوادينه
لا موسى فزع لمن عبر فرعون..........بجيوشه وكهنته وكل ثعابينه
ولا أعتب بعد وأسأل عله أبراهيم..........أذا نمرود ذبه أبنص جوانينه
مريم بجت عيسى وعيسى ما مصلوب..........شُبّه عالصليب النبي امعلگينه
عيسى ومريمك ما ظن بعد تنعاك..........وتگول العذر خلي الوطن يعفينه
ومتانين ربان ويه السفينه يعود..........ومن طوفانهم بلجت ينجينه
وبانت هالسفينه تعارك الطوفان..........متاع الرحله حضرنه وكراوينه
لنه يصيح بينه عذراً مقبطين..........ردنه وياه نصعد ما يخلينه
صحنه ولو وكفه هم بيهه راضين..........عذراً گال أخافن تنگلب بينه
رجع كسرى علينه وخيم بذي قار..........شب ناره وجمع زمرة شياطينه
ورجع حصن اليهود يريد منه الباب..........وعلينه يا وطن فزع حياطينه
ورجع ألنه أبرهه راكبله صهوة فيل..........طير اليقذف السجيل چا وينه
ورجع شعلان كيفنه رجع شعلان..........لاچنه رجع من غير عشرينه
بعد فالت عبد متعلگه بالديوان ..........تباهي دلته ورنة فناجينه
وبعد مگوار كاظم يذكر العشرين ..........وبعدهه واضحه من الدم عناوينه
لجن شلفايده من جيت احشم بيه..........عذره صحته وكبره ونظر عينه
ومن صارت أطلابه تناوش المگوار..........فشخ بيه أهل بيته وجوارينه
وجارك عود ربك وصه سابع جار..........بعدهه مغرزه بظهرك سچاچينه
ذاك الي تنخه وچان بيك يلوذ..........وذاك الترس من جودك مواعينه
جنت يا وطن بيدك تمسح أعله الروس..........وتزيل همومنه بمسحة نواصينه
يلحضنك حضن أم فاگده الويلاد..........غيرك يا حضن يكدر يدفينه
منكم يا عرب والله أنملينه جروح..........مو كافي الجره والبينه يكفينه
أذا أنته صدك هذا الجهاد البيك..........جولانك أسير وفرعو سينه
وگل لصاحبك من تلتقي وياه ..........خلي يروح ويحرر فلسطينه
برام الله ورفح أنفجر والجولان..........وبيافه أنفجر مو تنفجر بينه
مو تذبح أطفال وترعب النسوان..........وتحرك خيمة أم الحزن وسكينه
وترد كربله وتگطع علينه الماي..........وكلب حيدر تفجعه وتذبح حسينه
أمس فلشو گبتي وجامعي واليوم..........جاي بكل صلافة تريد تبنينه
لا للطائفيه ولا للأستعمار..........والف لا للدخيل الجاي يغوينه
سنه وشيعه وحده والوطن نبنيه..........ايد بايد ونثبت حياطينه[/align]
[align=center]أختلاف الرأي ...... لا يُفسد في الود قضية[/align]
رد مع اقتباس
