[align=center]غيرة گبل

امس چان الوكت باحظانه يبات
ونسولفله سوالف والفجر يغدي

وخوتنه گبل مو مثل هسه اخوان
كلمن بالاصول الواجبه ايأدي

تمثلنه بجسد تلگانه بي اعضاء
اذا يتعب عضو كل الجسد يعدي

اومن احزن گبل ما احسب حساب
واضمد جروح غيري وجرحي يندي

وغيرتنه گبل حته اعله عاشر جار
گبل لاينتخينه ارواحنه انودي

اشو هسه الوكت والخوه ما تنراد
لان ما مش اخوه ولا نفع تجدي

جربت الصديق بهاي الايام
ولا فد يوم عنه امنعت يدي

ردت منه يصبرني اعله دنياي
نساني وبالصبر گاعد يهدي

احس دنيانه كلشي البيهه معكوس
واحس كلشي صفه ابها الكون ضدي

اشوف الدنيه ظلمه ومايصح نور
وعمري من الاخير وياي يبدي

ومن ردت انه اخاف بهاي دنياي
لكيت الخوف خايف لايذ بسدي

ماگولن عجب لن هذا شئ ملموس
وصفت ناسك دغش يابيضنه اسودي

انصحچ ياليالي الفرح والخير
اخذي افراحچ وبيهه انتي شردي

تارات آنه اصب ادموع مجبور
ودمعتي من الحزن جرحت خدي

علامات الظهور تبان كل يوم
متگلي شوكت يظهر المهدي

غيرت هالوكت معدومه بين الناس
ما اجزم ولكن احس وحدي

وگبل چان الزلم بالنخل يتمثلون
طيبتهم مثل تمرة الزهدي

انه غيرة گبل مو مصلحه اليوم
ولاطبع الحيايه وغيرت جلدي

انه احزام الاخوي بساعة الضيج
وانه المايوم بعته وخنت وعدي

اذا صبه ذهب ما أحس وفاي
وذهب هاليوم ياصاحب يصدي

واگلك هالكلام وما ازل بيه
ولاتحسب رياء ايكون قصدي

بس ادري النخل شامخ يظل دوم
ونخلنه اعله الشواطي اليوم ديجدي

************************************************** ***

الشاعر
علي الجميلي[/align]