[align=center]سمعني شعر

سمعني شعر كال عله العراق
أريد أترجم إلي بينه صاير
مو بسمك توقع جوه الأوراق
ويه أهل الشعر تسمه شاعر
لسانك ليش ميت و الوطن عملاق
وأنت تشوف كل أرضك مقابر

سمعني شعر يوصل الذاك الصوب
ويقرر عللذمم تصحى الضماير
عكس ويانا صارت كلشي بالمكلوب
بينا الموت ياكل و العدو باير
شجانه و ليش وصرت الك مطلوب
وانت وياي بيهن كلها حاضر

سمعني شعر يلم شتات الراح
وينصب علوريد بصوته ساتر
كاعك هيه كاعي وانا مو فلاح
ولا صُخرة تجيني تكول حاضر
اترك كل سياسي بهالوطن ذباح
يخرب بيوت و يعمر مقابر

سمعني شعر بيه الحرف جلاد
ماريدن حرف يرضي الدفاتر
اريده شكد قوي و باشط وحاد
ماريدن شعر يجبر خواطر
الكلمن طائفي وباع الملح و الزاد
اريد اتذبحه فوك عللمنابر

لسمعنك شعر بيه الحرف كتال
واحنا اهل الشعر و النخوة و الجيرة
يسقط كل سياسي طائفي و دجال
و يسقط ثم يسقط بايع الغيرة
بس وياك عندي مشكلة واشكال
اريدن ناس تسمع شعري و ديرة
رباط الحجي محد سالنا و كال
واحنا بكل وكت نطرحه و نثيرة
صار سنين نكتب و القلم خيال
شو محد وصلنا وراد تفسيرة

لسمعنك شعر وانا الك ممنون
بس جيب الكلوب الصافية التسمع
لحشم كل قوافي بدفتري المدفون
واطيح عللوجع خلي القهر يطلع
ملينا الدمع ما ظل علينا عيون
شيطان الكراسي بدمعه ما يقنع
لفزعها بضميري وهالقلم مجنون
واذبحها القوافي الما رضت تفزع
اريد ناس تبصر عدهم عيون
ماريد اليصفك رايد اليسمع

جواد الفراتي
15.3.2008 [/align]